2024-05-03
Close
2024-05-03
जनकपुरधाम । धनुषाको मुखियापट्टी मुसहरनियामा विद्यालयमा भवन निर्माणको विषयलाई लिएर झडप भएको छ । दुई समूहबीच भएको झडपमा दुईजना गम्भीर घाइते भएका छन् ।
मुखियापट्टी मुसहरनिया गाउँपालिका ४ कोल्हुवा स्थित वैद्यनाथ देवनारायण जनता नमूना माध्यमिक विद्यालयमा आइतबार झडप भएको हो । भवन निर्माण गुणस्तरहीन भइरहेको र खर्च पारदर्शी नभएको भन्दै आइतवार भएको दुई पक्षीय झडपमा स्थानीय ज्ञानेन्द्र यादव र शंकर यादव गम्भीर घाइते भएका छन् ।
धनुषा प्रहरीका अनुसार घाइते मध्ये ज्ञानेन्द्रलाई थप उपचारका लागि काठमाडौ रेफर गरिएको छ । शंकरको उपचार जनकपुरको रामजानकी हस्पीटलमा भइरहेको छ ।
धनुषाका एसपी विश्वराज खड्काका अनुसार स्थानीय केही युवाहरुले विद्यालय भवन निर्माण कमसल र गुणस्तरहीन भइरहेको भन्दै खर्च हिसाब पारदर्शीको माग गर्दा बिबाद भएको थियो ।
बिबाद झडपमा परिणत भएपछि स्थिति नियन्त्रणमा लिन प्रहरीले तीन राउण्ड हवाई फायर गरेको छ ।
संघीय सरकारको नमूना विद्यालय कार्यक्रम अन्तर्गत डेढ करोडको बजेटमा निर्माण भइरहेको विद्यालय भवनको तेश्रो तल्लाको छत ढलान काम भइरहेको छ । तीन तल्ले भवन निर्माण गर्नु पर्ने सो भवनको पहिलो भूइतल्ला निर्माण भइसकेको छ भने दोश्रो र तेश्रो तल्लाको काम भइरहेको छ । विद्यालय व्यवस्थापन समिति नहुँदा वडा समितिद्वारा निर्माण समिति गठन गरी निर्माण कार्य भइरहेको स्थानीयले बताएका छन् ।
This will close in 20 seconds
