2024-12-12
Close
2024-12-12
जनकपुरधाम । धनुषाको हंसपुर नगरपालिका वडा नं. ५ सुगा-निकासमा रहेको ईलाका प्रहरी कार्यालय घेराउ गर्न पुगेका स्थानीय र प्रहरीबीच झडप हुँदा प्रहरीको गोली लागि २ जना घाइते भएका छन् । स्थानीयको कुटाईले घाइते भएका व्यक्तिको प्रहरीको कुटाईबाट निधन भएपछि आक्रोसित स्थानिय प्रहरी चौकी घेराउ गर्न पुगेको क्रममा स्थानीय र प्रहरीबिच झडप भएको हो । झडपको क्रममा भिड़लाई तितरवितर पार्न प्रहरीले गरेको हवाई फायरको क्रममा दुई जनालाई गोली लागेको छ ।
गोली लागेर सुगा निकासका ३६ वर्षीय शंकर मण्डल र १८ वर्षिय मतलुब अन्सारी घाइते भएका छन् ।
घाइते भएका अन्सारीको बायाँ पाखुरामा गोली लागेको छ भने अर्का घाइते मण्ड़लको दाहिने हाथमा गोली लागेको हो ।
प्रहरीको गोली लागेर दुईजना सहित झडपमा परी तिनजना घाइते भएको स्थानियले जनाएको छ ।
यता जिल्ला प्रहरी कार्यालय धनुषाका अनुसार आक्रोशित स्थानीयको भीड़ले ईलाका प्रहरी कार्यालयमा आगजनी गर्न थालेपछि प्रहरीले आत्मरक्षाका लागि गोली चलाएको जनाएको छ । आक्रोशित स्थानीयको भिड़ले प्रहरीऊपर आक्रमण गर्न खोजेको र सशस्त्र प्रहरीको एउटा मोटरसाइकल पूर्ण रुपमा जलाई दिएको र नेपाल प्रहरीको एउटा मोटरसाइकलमा समेत आगजनी गरी क्षतिग्रस्त बनाइ दिएको जिल्ला प्रहरी कार्यालय धनुषाले जनाएको छ ।
स्थानिय दिपा मण्डललाई स्थानीयबिचको विवादको क्रममा पकाउ गरि ईलाका प्रहरी कार्यालयमा लगिएका बेला प्रहरी सई तुलानन्द ठाकुरको पिटाईबाट मण्डलको संवेदनशिल अंगमा चोट लागेको थियो । उपचारको क्रममा उनको मृत्यु भएको स्थानीयले जनाएको छ ।
घाइते मध्ये अन्सारीको उपचार जनकपुरधामस्थित प्रादेशिक अस्पतालमा भई रहेको छ भने घाइते मण्डललाई थप उपचारकालागि काठमाडौँ रेफर गरिएको छ ।
यता धनुषा क्षेत्र नं.१ का सांसद दीपक कार्कीले घटना निन्दनीय रहेको बताउँदै घटनाको निश्पक्ष छानविन हुनुपर्ने माग गरेका छन् । छानविनबाट दोषी देखिएको व्यक्तिलाई कडाभन्दा कडा कानूनी कारबाही हुनुपर्ने माग गरे । यसका साथै प्रहरीको गोली लागि घाइते भएका दूबैजनाको उपचार खर्च राज्यले ब्यहोर्नुपर्ने माग गरेका हुन् ।
