2025-04-25
Close
2025-04-25
विनय आजाद
सिरहा । सिरहाको गोलबजारस्थित तस्करीका सामान भण्डारण गरिएको एक गोदाममा प्रहरी र भन्सारले छापा हानेको छ । गोलबजारको माँ धमिनी डेरी उद्योगमा बिहीबार साँझ नेपाल प्रहरी, सशस्त्र प्रहरी र भन्सार कार्यालयले संयुक्त रुपमा छापा हानेको हो । प्रहरीका अनुसार, गोदाममा भारतबाट ल्याइएका पाउडर दूध र चिनीलगायतका अवैध सामान भेटिएका छन् ।
तर, गोदाममा छापा हान्ने क्रममा तस्कर गिरोहले मान्छे लगाएर हुलदंगा गर्न खोजेपछि गोदाम सिल गरेर प्रहरी र भन्सारको टोली फर्केको छ ।
गोदाममा भेटिएका सामानको परिमाण र मूल्य भने शुक्रबार मात्रै यकिन हुने जिल्ला प्रहरी कार्यालय, सिरहाका प्रमुख प्रहरी उपरीक्षक अनन्तराम शर्माले बताए । आन्तरिक राजस्व कार्यालय, लहानको टोली पनि शुक्रबार त्यहाँ पुग्ने र त्यसपछि कानुनी कारबाही प्रक्रिया अगाडि बढ्ने उनले बताए ।
स्रोतका अनुसार, यो तस्कर गिरोहले संगठित रुपमै सम्बद्ध निकायको मिलेमतोमा पाउडर दूध, चिनीलगायतका खाद्यवस्तु भारतबाट तस्करी गरी ल्याएर यो गोदाममा भण्डार गर्ने र रातिको समयमा दूधको ट्यांकरमा काठमाडौंसहित सहरमा लाने गरेका छन् ।
