2024-04-25
Close
2024-04-25
प्रमुख समाचार
जनकपुरधाम । आज नेपाल संघिय लोकतान्त्रिक गणतन्त्रात्मक मुलुक बन्नुमा शहीदहरुको ठुलो योगदान छ । विभिन्न कालखण्डमा शहादत प्राप्त गरेका शहीदहरुको अतुलनीय योगदानकै कारण आज हामीले देशमा गणतन्त्र पाएका छौं । जनताले संघीयताको अनूभुति गरिरहेको वर्तमान अवस्थामा शहीदहरुको महत्वपूर्ण भूमिका देखिन्छ । झन मधेश आन्दोलनकै जगमा स्थापना भएको प्रदेश २ सरकारका लागि भने शहीदहरुको योगदान र बलिदानी अविस्मरणीय हुनुपर्ने देखिन्छ ।
तर प्रदेश २ मा भने तिनै शहीदहरुको अपमान गरिएको छ । प्रदेशको भौतिक पूर्वाधार विकास मन्त्रालयको जिम्मेवारी सम्हालिरहेका यसअघिका मन्त्री जितेन्द्र सोनलले आफ्नो कार्यकक्षमा मधेश आन्दोलनका शहीदहरुका साथै जनआन्दोलनका शहीदहरुको तस्वीर राखेका थिए । तर तीनै शहीदहरुको तस्वीर नवनियुक्त भौतिक पूर्वाधार विकास मन्त्री रामसरोज यादवले हटाएर काँग्रेसी विचारसँग नजिकका नेताहरुको तस्वीर लगाएपछि तस्वीरको राजनीति प्रदेश २ मा समेत सुरु भएको देखिएको छ ।
गत जेठ २६ गते नेपाली कांग्रेसको तर्फबाट भौतिक पूर्वाधार विकास मन्त्रीको जिम्मेवारी पाएका यादवले आफ्नो कार्यकक्षमा राष्ट्रप्रमुख र प्रधानमन्त्रीको फोटो नराखेपनि काँग्रेस नेताहरुको फोटो भने राख्न बिर्सेका छैनन् । उनले आफ्नो कार्यकक्षमा राष्ट्रपति विद्यादेवी भण्डारी र प्रधानमन्त्री केपी शर्मा ओलीको फोटो नराखेपनि विपी कोईराला, महेन्द्रनारायण निधि, रामनारायण मिश्र र शहिद दुर्गानन्द झाको फोटो राख्न छुटाएका छैनन् ।
यसअघि त्यहाँ मन्त्रीको कुर्सीको माथी मधेश आन्दोलनका शहीद तथा जनआन्दोलनका शहीदहरुको तस्वीर थियो तर त्यहाँबाट ती तस्वीरहरु अहिले हटाइएका छन् । प्रायः मन्त्रालयहरुमा राष्ट्रपति र प्रधानमन्त्रीको फोटो राख्ने परम्परा रहेको छ । अन्य देशहरुमा समेत मन्त्रालयहरुमा राष्ट्राध्यक्षको तस्वीर राख्ने चलन छ ।
डा. रामवरण यादव राष्ट्रपति रहेको समयमा नेपाल विद्यार्थी संघले समेत सरकारी कार्यालयमा राष्ट्रपतिको तस्वीर राख्ने अभियान नै संचालन गरेको थियो । सोनल मन्त्री हुँदा मधेस आन्दोलनका शहीदहरुका साथै जनआन्दोलनका शहीदहरुको तस्वीर मन्त्रालयमा राख्न लगाए । मन्त्री यादवका स्वकीय सचिव धिरेन्द्र मोहन झाले मन्त्रीज्यूको कार्यकक्षमा राष्ट्रपति र प्रधानमन्त्रीको फोटो पहिले देखि नै नरहेको दावी गरे ।
उनले पहिलेदेखि नै रहेको मधेश आन्दोलन तथा जन आन्दोलनका शहीदहरुको तस्वीर नटहाएको र चार वटा फोटो थप गरिएको जानकारी दिए । उनले भने, ‘उहाँहरुको योगदान मधेस विकासमा रहेकाले शहिदको तस्वीरलाई पनि सोही कोठाको अन्य भित्तामा राखिएको छ ।’
यसअघि सोही मन्त्रालयका मन्त्री रहेका जितेन्द्र सोनलले आफ्नो कार्यकक्षमा राष्ट्रपति र प्रधानमन्त्रीको फोटो राखिएको वा नराखिएको भन्ने विषयमा आफूलाई स्मरण नरहेको बताए ।
This will close in 20 seconds
