सप्तरी । जनता समाजवादी पार्टी (जसपा) नेपालका सक्रिय नेता तथा प्राविधिक क्षेत्रमा सशक्त योगदान दिएका इन्जिनियर संजिव नरायण यादवले पार्टीका सम्पूर्ण जिम्मेवारी त्याग गर्दै औपचारिक रूपमा जसपा नेपाल परित्याग गरेका छन् । यादवले पार्टीको केन्द्रीय महाधिवेशन प्रतिनिधि, समाजवादी इन्जिनियर्स नेपालका केन्द्रीय सह–अध्यक्ष तथा जसपाको साधारण सदस्यबाट समेत राजीनामा दिएका हुन् ।
उनले सामाजिक सञ्जालमार्फत सार्वजनिक गर्दै लेखेका छन्, केही कार्यव्यस्तताका साथै युवालाई नेतृत्व नदिने, भातृ संगठनमा सीमित राखेर गुमराह बनाउने प्रवृत्तिका कारण मैले पार्टीबाट अलग हुने निर्णय गरेको छु । पार्टीभित्र लोकतन्त्रको अभाव छ । नयाँ पुस्तालाई सधैँ पछाडि पार्ने, पुरानै संरचनामा अल्झिने प्रवृत्तिका कारण अब सहकार्य असम्भव देखियो ।
२०७३ सालदेखि पार्टी राजनीतिमा
इन्जिनियर यादव २०७३ सालदेखि जसपाको राजनीतिक गतिविधिमा सक्रिय थिए । २०७५ सालदेखि उनले पार्टीका विभिन्न तह र संगठनहरूमा जिम्मेवारी सम्हाल्न थालेका थिए । खासगरी, प्रविधि र युवा वर्गलाई संगठित गर्ने अभियानमा उनी अग्रपंक्तिमा रहँदै आएका थिए ।
उनको नेतृत्वमा २०७१ सालमा संजिव यादवको संयोजनमा गठन भएको मधेस इन्जिनियर्स एशोसिएसनले संगठनात्मकरूपमा उल्लेखनीय फड्को मारेको थियो । ५०० भन्दा बढी इन्जिनियरहरूलाई एकसाथ संगठित गर्दै जसपा नेपालमा भित्र्याउने अभियानमा इन्जिनियर यादवको भूमिका निर्णायक रह्यो । तीमध्ये अधिकांश मधेसका शिक्षित, प्राविधिक र सचेत युवाहरू थिए ।
२०७९ को प्रदेशसभा निर्वाचनमा स्वतन्त्र उम्मेदवारी
पार्टीभित्र बढ्दो असन्तोष र दिशाहीन नेतृत्वशैलीका कारण यादवले २०७९ सालको प्रदेशसभा निर्वाचनमा स्वतन्त्र उम्मेदवारको रूपमा प्रतिस्पर्धा गरेका थिए । उनी जसपाका बलियो कार्यकर्ता भए पनि, पार्टी नेतृत्वले उनलाई अवसर नदिएको भन्दै उनी स्वतन्त्र रूपमा मैदानमा उत्रिएका थिए । यस कदमले तत्कालीन समयमा मधेसमा पार्टी नेतृत्वविरुद्ध असन्तुष्टहरूको आवाजलाई झनै स्पष्ट बनाएको थियो ।
“युवालाई गुमराह बनाउने प्रवृत्ति डरलाग्दो छ”
पार्टी त्यागको कारणबारे स्पष्ट रूपमा धारणा राख्दै यादवले भनेका छन्, वर्षौँदेखि पार्टीले युवालाई केवल भातृ संगठनमा सीमित राख्दै आएको छ । नेतृत्वमा पुराना अनुहारहरू मात्र छन्, न त उनीहरूले परिवर्तन गर्न सक्छन्, न त नयाँ नेतृत्व तयार पार्न। यो प्रवृत्ति अब सह्य छैन ।
उनले थप भनेका छन्, पार्टीमा संरचनात्मक विकृति मात्र छैन, संस्कारगत अधिनायकवाद पनि व्याप्त छ । सोच्ने, बोलेका युवालाई चुप लगाइन्छ, संगठनात्मक बैठकमा आवाज उठाउनेलाई उपेक्षा गरिन्छ ।
मधेस इन्जिनियर्सको झिनो आशा पनि समाप्त
इन्जिनियर यादवको राजीनामा मधेस इन्जिनियर्स संगठनको भावी भविष्यप्रति पनि प्रश्न उठाउँछ । उनले संगठनलाई जसपा भित्र्याउँदा जसपाको नीति, विचार र मधेसप्रतिको प्रतिबद्धतामा विश्वास गरेका थिए। तर, पछिल्लो समयमा त्यही संगठनका अधिकांश सदस्यहरू पार्टीबाट विमुख हुन थालेका छन् ।
विशेषज्ञहरू भन्छन्, जसपा नेपालले मधेसका पढेका, दक्ष र सक्षम युवालाई संगठित गर्ने दुर्लभ अवसर गुमाएको छ । यादवजस्तो इमान्दार, निस्वार्थ, प्राविधिक पृष्ठभूमिका नेताले पार्टी त्याग्नु भनेको जसपाको ठूलो क्षति हो ।
अबको बाटो
इन्जिनियर यादवले अबको राजनीतिक यात्रा कुन पार्टी वा अभियानसँग गर्ने भन्नेबारे खुलासा गरेका छैनन् । तर, उनले भनेका छन्, हामी यस्तो राजनीतिक विकल्पको पर्खाइमा छौं, जहाँ युवाले नेतृत्व पाउँछन्, मधेसको हकहित बोल्न पाइन्छ, र निष्ठाका आधारमा सम्मान मिल्छ ।
उनको यो अभिव्यक्तिले संकेत गर्छ कि उनी आगामी दिनमा कुनै नयाँ राजनीतिक अभियान, वा नयाँ संरचनामा प्रवेश गर्न सक्नेछन् । यो सम्भावनालाई दृष्टिगत गर्दै मधेसका राजनीतिक विश्लेषकहरू भन्दैछन्–अब मधेसको राजनीति फेरि युवाको आवाजमा फर्कने छ, जसपा पुरानै शैलीमा अल्झिरहँदा अरू पार्टीले त्यसको लाभ उठाउने छन् ।
इन्जिनियर संजिव नरायण यादवको जसपा परित्याग सामान्य घटना होइन । उनले जसपाभित्र प्रवेश गराएको इन्जिनियर युवाको ठूलो समूह, संगठनात्मक योगदान र वैचारिक स्पष्टताले उनलाई मधेसको राजनीतिमा एक सशक्त युवानेता बनाएको छ ।
उनले उठाएका प्रश्नहरू केवल व्यक्तिगत असन्तुष्टि होइन, त्यो त पार्टीभित्रको मौन असन्तोषको प्रतिनिधि स्वर हो। अब मधेसको राजनीति कुन दिशातर्फ मोडिन्छ भन्ने हेर्न बाँकी छ–तर यादवको निर्णयले पार्टीहरूलाई गम्भीर आत्ममूल्यांकन गर्न बाध्य बनाउने निश्चित छ ।

बिज्ञापन