2025-06-23
Close
2025-06-23
अप्पन जनकपुर
जनकपुरधाम । धनुषाको शहिदनगर नगरपालिकाको १३ औं नगर अधिवेशन विधिवत रूपमा सम्पन्न भएको छ। अधिवेशनको उद्घाटन मधेश प्रदेशसभा सदस्य तथा जनता समाजवादी पार्टी नेपालका प्रमुख सचेतक रामअशिष यादवले गरेका थिए।
उद्घाटन समारोहमा बोल्दै प्रमुख अतिथि यादवले संघीय लोकतान्त्रिक गणतन्त्रले देशको ग्रामीण क्षेत्रमा विकासको गति तीव्र बनाएको बताए। उनले मधेशका गाउँ शहरमा संघीयताको प्रभावले विकास निर्माणमा उल्लेखनीय वृद्धि भएको धारणा राखे।
कार्यक्रममा नगर प्रमुख दिनेश प्रसाद यादवले आफ्नो कार्यकालमा सडक, नाला, शिक्षा, स्वास्थ्य तथा कृषि क्षेत्रमा महत्त्वपूर्ण सुधार भएको जानकारी दिए। उनले शहिदनगरको एकीकृत विकास योजनाअन्तर्गत निर्माण कार्यलाई तीव्रता दिइएको बताए।
नगर प्रमुख यादवको अध्यक्षतामा सम्पन्न अधिवेशनमा प्रमुख प्रशासकीय अधिकृत उमेश साह, वडाध्यक्षहरू मनोज दास, सुरेश कापर, तनुकलाल कुसियैत, नेपाली कांग्रेसका महाधिवेशन प्रतिनिधि राजदेव यादव, नेकपा माओवादी केन्द्रका भोला यादव लगायतका व्यक्तिहरूले शुभकामना मन्तव्य व्यक्त गरेका थिए। कार्यक्रमको सञ्चालन रामसिकिल यादवले गरेका थिए।
अधिवेशनमार्फत आर्थिक वर्ष २०८२र०८३ का लागि ६२ करोड ७२ लाख ३५ हजार ४ सय ८ रुपैयाँ बराबरको वार्षिक नीति तथा बजेट कार्यक्रम प्रस्तुत गरिएको छ।
यसैबीच, उपमेयर सुनिता सिंहसहित कांग्रेसबाट निर्वाचित वडाध्यक्षहरूले नगरसभाको विरोध जनाउँदै मेयर र प्रमुख प्रशासकीय अधिकृतलाई भ्रष्टाचारको आरोप लगाएका छन्। उनीहरूले ‘भ्रष्टाचारी मुर्दाबाद’ नारासहित यदुकुहा सडकमा केही समय चक्काजामसमेत गरेका थिए।
