2025-05-29
Close
2025-05-29
जनकपुरधाम । धनुषाको ईलाका प्रशासन कार्यालय यदुकुहाबाट जारी गरिएको राहदानी (पासपोर्ट) प्रमाणपत्र फर्जी भेटिएको प्रकरणले सनसनी फैलिएको छ। हालसम्म सो कार्यालयबाट जारी गरिएका तीनदेखि चारवटा प्रमाणपत्र फर्जी भएको पुष्टि भएको छ।
ईलाका प्रशासन कार्यालय यदुकुहाका प्रमुख गणेशचन्द्र मिश्रले फर्जी राहदानी प्रमाणपत्र फेला परेको स्वीकार गरेका छन्। तर ती राहदानी कसको नाममा, कहिले र कुन अधिकृतमार्फत जारी गरिएको भन्ने विवरण खुलाउन मानेनन्। उनले भने, ‘३–४ वटा राहदानी फर्जी फेला परेका छन्, तर विस्तृत विवरण अहिले भन्न मिल्दैन।’
फर्जी राहदानी प्रकरण सार्वजनिक भएपछि स्थानीय नागरिक समाज तथा सरोकारवालाहरूले प्रशासनिक संयन्त्रमै गम्भीर कमजोरी रहेको भन्दै तत्काल छानबिन समिति गठन गर्न माग गरेका छन्। स्थानीय रमन यादव भन्छन्, ‘राहदानी प्रमाणपत्रजस्तो संवेदनशील कागज फर्जी हुने हो भने यो राज्यप्रतिकै अविश्वास हो। दोषी जोसुकै होस्, कडा कारबाही हुनु पर्छ।’
तर जिल्ला प्रशासन कार्यालय, धनुषाका प्रमुख जिल्ला अधिकारी रामुराज कडरीयाले भने आफूलाई फर्जी राहदानी प्रमाणपत्रको विषयमा कुनै जानकारी नभएको बताएका छन्।
एक प्रशासनिक स्रोतका अनुसार उक्त राहदानी प्रकरणमा सरकारी कर्मचारी वा बाह्य दलाल समूहको संलग्नता रहेको आशंका गरिएको छ।
स्थानीय प्रशासनमाथिको यो प्रश्नचिन्हले देशका अन्य जिल्लामा समेत यस्ता फर्जी कार्य भइरहेको सम्भावना खारेज गर्न नसकिने देखिएको छ। यदि समयमा नियन्त्रणमा लिइएन भने यसले राष्ट्रियस्तरमै गम्भीर असर पार्न सक्ने सरोकारवालाहरूको भनाइ छ।
