जनकपुरधाम । जनकपुरधाम उपमहानगरपालिकाले प्रदान गर्दै आएको छात्रवृत्ति अनुसार एसएम कलेज जनकपुरधामले शैक्षिक सत्र २०८३/०८४ का लागि कक्षा–११ को छात्रवृत्ति परीक्षा शुक्रबार सफलतापूर्वक सम्पन्न गरेको छ ।
व्यवस्थापन, शिक्षा, मानविकी तथा कानुन संकायतर्फ अध्ययन गर्न इच्छुक विद्यार्थीहरूका लागि आयोजित छात्रवृत्ति परीक्षा बिहान ८ बजेदेखि शान्तिपूर्ण र व्यवस्थित रूपमा सञ्चालन गरिएको कलेज प्रशासनले जनाएको छ ।
कलेजका सञ्चालक सन्तोष यादवका अनुसार परीक्षामा विद्यार्थीहरूको उत्साहजनक सहभागिता रहेको थियो । उनले परीक्षा निष्पक्ष, पारदर्शी तथा व्यवस्थित ढंगले सञ्चालन गरिएको बताउँदै विद्यार्थीहरूको सक्रिय सहभागिताले कलेजप्रतिको विश्वास र छात्रवृत्तिप्रति बढ्दो आकर्षण झल्काएको बताए।
एसएम कलेजले प्रत्येक वर्ष आर्थिक रूपमा कमजोर तथा अध्ययनमा उत्कृष्ट विद्यार्थीहरूलाई उच्च शिक्षामा पहुँच विस्तार गर्ने उद्देश्यले छात्रवृत्ति परीक्षा सञ्चालन गर्दै आएको छ । यस कार्यक्रमअन्तर्गत उत्कृष्ट नतिजा हासिल गर्ने विद्यार्थीहरूलाई पूर्ण तथा आंशिक छात्रवृत्ति प्रदान गरिने व्यवस्था रहेको छ ।
कलेज प्रशासनका अनुसार परीक्षामा सहभागी विद्यार्थीहरूको उत्तरपुस्तिका मूल्यांकनपछि योग्य विद्यार्थीहरूको नामावली सार्वजनिक गरिनेछ । छात्रवृत्ति प्राप्त गर्ने विद्यार्थीहरूको अन्तिम सूची केही दिनभित्र प्रकाशन गरिने जनाइएको छ ।
सामाजिक उत्तरदायित्वअन्तर्गत सञ्चालन हुँदै आएको यो कार्यक्रमले प्रतिभावान तथा मेहनती विद्यार्थीहरूलाई गुणस्तरीय शिक्षामा पहुँच पुर्याउन महत्वपूर्ण योगदान दिँदै आएको कलेजको भनाइ छ ।
जनकपुरधाम क्षेत्रको प्रतिष्ठित शैक्षिक संस्थाका रूपमा परिचित एसएम कलेजले विभिन्न संकायमा उच्च शिक्षाको अवसर उपलब्ध गराउँदै आएको छ । शिक्षा क्षेत्रका जानकारहरूका अनुसार छात्रवृत्ति परीक्षाले कलेजको शैक्षिक गुणस्तर, प्रतिस्पर्धात्मक वातावरण र सामाजिक समावेशितालाई थप सुदृढ बनाएको छ ।
