महोत्तरी । प्रधानमन्त्री केपी शर्मा ओली शुक्रबार महोत्तरी जिल्लाको मटिहानी नगरपालिकामा दुईवटा महत्वपूर्ण पूर्वाधार आयोजनाको समुद्घाटन गर्न आउने भएका छन् ।
नगर प्रमुख हरि मण्डलका अनुसार प्रधानमन्त्री ओलीले बिहान ११ बजे मटिहानी नगरपालिका–८ स्थित नवनिर्मित बिग्ही नदीमाथिको पुलको समुद्घाटन गर्ने कार्यक्रम रहेको छ ।
त्यसपछि बिहान ११:३० बजे मटिहानी नगरपालिका–६ मा निर्माण सम्पन्न भएको प्रसूति गृह भवनको औपचारिक उद्घाटनसमेत प्रधानमन्त्री ओलीले गर्नेछन् ।
प्रधानमन्त्रीको आगमनलाई मध्यनजर गर्दै स्थानीय प्रशासन, सुरक्षा निकाय र नगरपालिकाले तयारी तीव्र पारेका छन् । कार्यक्रमस्थलमा सुरक्षा व्यवस्था कडा पारिएको छ भने स्थानीय बासिन्दामा उत्साह देखा परेको छ ।
नगर प्रमुख मण्डलले मटिहानीको विकासका लागि यस्ता पूर्वाधार परियोजनाहरू महत्वपूर्ण हुने विश्वास व्यक्त गर्दै प्रधानमन्त्रीको आगमनले थप योजना कार्यान्वयनमा प्रेरणा दिने बताए ।
