2024-05-04
Close
2024-05-04
जनकपुरधाम । मधेशका मुख्यमन्त्री सरोज कुमार यादवले स्वास्थ्य मन्त्रीले उम्मेदवारको सिफारिस गरेर नपठाउँदा मधेश स्वास्थ्य विज्ञान प्रतिष्ठानको उपकुलपति नियुक्तिमा ढिलाइ भएको बताएका छन् ।
‘स्वास्थ्य मन्त्रीले म कहाँ सिफारिस गरेर पठाएको भोलिपल्टै उपकुलपति नियुक्त गरेर पठाइदिन्छु । ढिलाइ उतै भएको छ,’ प्रतिष्ठानका कुलपतिसमेत रहेका मुख्यमन्त्री यादवले अनलाइनखबरसँग भने ‘अब दुई/तीनदिन भित्रै मेरो हातमा सिफारिस आइपुग्छ । म नियुक्ति गरिदिन्छु ।’
मुख्यमन्त्री यादव र स्वास्थ्य तथा जनसंख्या मन्त्री विरेन्द्र सिंहले आफ्ना मान्छेलाई उपकुलपति बनाउन हानथाप चलिरहेको कारण नियुक्तिमा ढिलाइ भएको समाचार अनलाइनखबरले सार्वजनि गरेको थियो ।
मुख्यमन्त्री यादवले उपकुलपति सिफारिसका लागि आफूले कुनै हस्तक्षेप नगरेको समेत दाबी गरे । स्वास्थ्यमन्त्री सिंह कांग्रेसका हुन् ।
कांग्रेसको विभिन्न अधिवेशन लगायतको विभिन्न कार्यक्रमले उपकुलपति सिफारिसमा विलम्ब गरेको, तर अब चाँडै आफ्नो हातमा सिफारिस आइपगेर नियुक्ति गरिने मुख्यमन्त्री यादवको भनाइ छ ।
२५ जेठमा प्रतिष्ठानका उपकुलपति डा. रामकेवल साहको निधन भए पनि १० महिना बित्न लाग्दासमेत पद रिक्त छ ।
उपकुलपतिको अभावमा तीनपटक गरेको करार कर्मचारी भर्ना विज्ञापन अनुसार भर्ना लिन नसक्दा प्रतिष्ठान अन्तर्गतको प्रादेशिक अस्पताल जनकपुर र पठनपाठनमा समस्या भइरहेको छ ।
स्वास्थ्य मन्त्रालयले प्रतिष्ठानमा उपकुलपति नियुक्तिका लागि १८ असोजमा दरखास्त आहृवान गरेको थियो । १५ र २१ कार्तिकमा ९ उम्मेदवारको नामावलीको दरखास्त परेको नामावली प्रकाशन गरेको थियो ।
मन्त्रालय स्रोतका अनुसार दरखास्त दिएका डा. विद्यानाथ यादव (सप्तरी) जसपा अध्यक्ष उपेन्द्र यादका सम्धी हुन् । डा.रमेशप्रसाद सिंह (सर्लाही) स्वास्थ्यमन्त्री सिंहका जिल्लावासीसँगै निकटस्थ हुन् भने प्रतिष्ठानका शिक्षाध्यक्षसमेत रहेका डा. अंकुर साह निमित्त उपकुलपति पनि छन् ।
मुख्यमन्त्रीले उपेन्द्रका सम्धी विद्यानाथ र स्वास्थ्य मन्त्रीले रमेश प्रसादलाई बनाउने स्वार्थमा विवाद हुँदा ढिलाइ भइरहेको मन्त्रालयका एक अधिकारीले बताएका छन् ।
तर, मुख्यमन्त्री यादवले उपेन्द्र यादवको सम्धीलाई उपकुलपति बनाउन कुनै भूमिका नखेलेको दाबी गरे ।
‘उपेन्द्रजीको सम्धीको सिफारिस गर्न मैले कहिल्यै भनेकै छैन । मन्त्रालयको स्वास्थ्य समितिले सिफारिस गरेकोबाट जसको नाम १ नम्बरमा आउँछ । म उनैलाई उपकुलपतिमा नियुक्ति गर्छु’ मुख्यमन्त्री यादवले भने, ‘म मुख्यमन्त्री हुँदा पनि कुनै पनि मन्त्रालयमा इनरफेयर गरेको छैन ।’
This will close in 20 seconds
