जनकपुरधाम । मधेश प्रदेशका जिल्लाहरूमा मादकपदार्थ सेवन गरेर सवारी चलाएका कारणले दुर्घटनामा वृद्धि भएपछि विश्व स्वास्थ्य सङ्गठनले त्यसमा कमी ल्याउन लागि प्रदेश सरकारलाई ३० थान ब्रेथलाइजर मेसिन हस्तान्तरण गरेको छ ।

विश्व स्वास्थ्य सङ्गठनका प्रतिनिधि डा. केदार खड्काले मधेश प्रदेशका मुख्यमन्त्री सरोजकुमार यादवलाई आज आइतबार जनकपुरधामस्थित मधेश भवनमा आयोजित कार्यक्रममा ३० थान ब्रेथलाइजर मेसिन हस्तान्तरण गरेका छन्  ।

कार्यक्रममा मुख्यमन्त्री यादवले प्राप्त भएका ब्रेथलाइजर मेसिन मधेश प्रदेशका प्रहरी प्रमुख प्रहरी नायब महानिरीक्षक यज्ञविनोद पोखरेललाई हस्तान्तरण गरे ।

सडक सुरक्षाका लागि उपयोगी ती ब्रेथलाइजर मेसिन आवश्यकताका आधारमा मधेश प्रदेशका ८ वटा जिल्लामा चेक प्वाइन्ट तोकेर हस्तान्तरण गरिने मधेश प्रदेश प्रहरी कार्यालय जनकपुरधामले जनाएको छ ।

कार्यक्रममा मुख्यमन्त्री यादवले प्रहरीलाई प्रदेशमा शान्ति सुरक्षा तथा सडक सुरक्षाका लागि आवश्यक पर्ने सबै प्रकारका साधनस्रोत उपलब्ध गराउनका लागि प्रदेश सरकार तयार रहेको बताए ।

उनले ट्राफिक प्रहरीले मान्छेको जीवनरक्षाका लागि जाँच गर्नुका साटो बढी राजश्व सङ्कलन गर्नका लागि जाँच गरेको पाइएको गुनासो गरे ।

उनले मधेशका जनतालाई सवारीचालक अनुमतिपत्र पाउनमा कुनै कठिनाइ नहोस् भन्नका लागि प्रदेशका ८ वटै जिल्लामा यातायात व्यवस्था कार्यालय स्थापना गरेर चालक अनुमतिपत्र पाउने योग्यता तथा क्षमता भएकालाई दिनुपर्ने पक्षमा प्रदेश सरकार रहेको भन्दै  यसका लागि ट्रायल सेन्टरहरूमा सेन्सर जडान गर्ने गरी सरकार अगाडि बढेको बताए ।

मुख्यमन्त्री यादवले आफू मुख्यमन्त्री भए पनि प्रदेशमा शान्ति सुरक्षासँग सम्बन्धित कतिपय विषयमा जानकारी नहुने गरेको उल्लेख गर्दै प्रहरीले आफूहरूसँग समन्वय नगरेको गुनासो गरे ।

मधेश प्रदेशका गृह, सञ्चार तथा कानुनमन्त्री मोहम्मद समिमले मधेश प्रदेशमा रहेको बढ्दो सवारी दुर्घटनालाई न्युन गर्नका लागि प्रदेश सरकारले सबै प्रकारका सहयोग गर्न तयार रहेको बताए ।

उनले विश्वस्वास्थ्य सङ्गठनले प्रदान गरेका ब्रेथलाइजर मेसिनबाट दुर्घटना न्युन गर्नमा मद्दत पुग्ने विश्वास व्यक्त गरे ।

मधेश प्रदेशका जिल्लाहरूमा चालु आर्थिक वर्षको हालसम्म भएका सडक दुर्घटनामा परेर २ सय ५५ जनाको मृत्यु भएको छ भने गत आर्थिक वर्षमा ५ सय ४६ जनाको मृत्यु भएको थियो  ।

चालु आर्थिक वर्षमा ५ हजार ७४ सवारी दुर्घटनामा परेर घाइते भएका छन् । गत वर्ष ९ हजार ६ सय ७२ जना घाइते भएका थिए ।

सम्बन्धित

धनुषा ट्राफिक प्रहरी नयाँ प्रमुखमा इन्स्पेक्टर ओलि आउँदै

पत्रकार यादवको घटनामा ४ जनामाथि मुद्दा दर्ता, एक पक्राउ, तीन फरार

कमला नगरपालिकाको एम्बुलेन्स महिनौंदेखी मेयरको घरमा, उपमेयर खोज्दै एम्बुलेन्स

सुधारगृहमा युवकको मृत्यु : कुटेर हत्या गरिएको परिवारको आरोप

कार्यकर्तालाई इमानदार बन्न एमाले अध्यक्ष ओलीको आग्रह

प्रहरीकै संलग्नतामा हिरासत छल्न अभियुक्तलाई राम जानकी हस्पिटलमा होटलको सुविधा

सुहाङ नेम्वाङले आज सांसद पदको शपथ लिँदै

जनकपुर : पुलचोकमा बौलाहा कुकुरले टोकेर ६ वर्षीया बालिकाको मृत्यु