2025-04-30
Close
2025-04-30
अप्पन जनकपुर
जनकपुरधाम । जनकपुरधाम उपमहानगरपालिका वडा नं. १ अन्तर्गत मोनास्टिक स्कुलको गल्ली हुँदै रेल्वे निस्किने बाटोदेखि गंगाराम यादवको घरसम्मको क्षेत्रमा अब उज्यालोले झलमल्ल हुने भएको छ ।
राष्ट्रिय युवा संघ मधेश प्रदेशका अध्यक्ष लव अधिकारीले आफ्नै व्यक्तिगत लगानीमा उक्त क्षेत्रमा ७० वटा विद्युतीय बल्ब जडान गराएका छन् । स्थानीय बासिन्दाले लामो समयदेखि सो क्षेत्रमा अँध्यारोका कारण आवतजावतमा कठिनाइ भोग्दै आएका थिए । यस कार्यले स्थानीयवासीहरूमा उत्साह र सकारात्मक प्रतिक्रिया देखिएको छ ।
लव अधिकारीले जनताको आधारभूत आवश्यकतामा प्राथमिकता दिँदै आफू सदैव समुदायको सेवामा क्रियाशील रहेको बताउँदै आएका छन् । यस पहलमार्फत उनले नागरिकलाई सुरक्षित, व्यवस्थित र उज्यालो वातावरण दिन खोजेको जनाएका छन् ।
स्थानीय बासिन्दाहरूले अधिकारीको यो कार्यको खुलेर प्रशंसा गरेका छन् । विश्वसनीय स्रोतका अनुसार, लव अधिकारी अब आउने स्थानीय तह निर्वाचनमा जनकपुरधाम वडा नं. १ को वडाध्यक्ष पदको लागि उम्मेदवारी दिने तयारीमा छन् । उनका समर्थकहरू यसलाई चुनावी तयारीको भागका रूपमा हेरे पनि, अधिकारी स्वयंले यसलाई सामाजिक सेवाको निरन्तरता मात्र भनेका छन् । उनले भने, मेरो प्राथमिकता सेवा हो । जनताले मप्रति विश्वास देखाए भने म वडाध्यक्षको जिम्मेवारी लिएर जनताको साथ रहनेछु ।
सडक बत्तीको व्यवस्था सँगै उनले अन्य विकासे काममा पनि लगानी गर्ने संकेत दिएका छन् । अधिकारीले सडक मर्मत, ढल व्यवस्थापन, शिक्षा र युवाहरूको स्वरोजगारका क्षेत्रमा काम गर्ने योजना बनाएको जानकारी दिएका छन् । यसरी उज्यालोले भरिएको उक्त क्षेत्र अब लव अधिकारीको पहलले मात्र होइन, सम्भावित नेतृत्वको एउटा उदाहरणका रूपमा पनि हेरिन थालेको छ ।
