अप्पन जनकपुर
जनकपुरधाम । धनुषाको जनकनन्दिनी गाउँपालिकाको ८ औं गाउँसभा सफलतापूर्वक सम्पन्न भएको छ ।
शुक्रबार भएको ८ औं गाउँसभाबाट गाउँपालिकाको लागि ४७ करोड बढी बजेट अनुमान गरिएको छ । शिक्षा , स्वास्थ्य र कृषिलाई प्राथमिकतामा राखी भौतिक पूर्वाधार निर्माणको अवधारणालाई मुख्य मुद्दाको रुपमा अगाडी सारिएको हो ।
गाउँपालिकाका अध्यक्ष दिपिन देव यादवको सभापतित्व तथा उपाध्यक्ष कमला सहगलको विशेष आतिथ्यमा आर्थिक बर्ष २०७९÷०८० को बजेट सार्वजनिकीकरण गरिएको हो ।
आर्थिक वर्ष २०७९÷०८० को लागि कुल ४७ करोड २९ लाख ९६ हजार अनुमानित बजेट सार्वजनिकीकरण गरिएको हो । जनकनन्दिनी गाउँपालिका वडा नम्बर ४ स्थित रहेको स्वास्थ्य चौकीको सभाहलमा युवा, विद्यार्थी, जेष्ठ नागरिक, कर्मचारी, भद्रभलादी, विभिन्न राजनीतिक दलका प्रतिनिधि, सँचारकर्मी, सुरक्षाकर्मीको उपस्थितिमा बजेट सार्वजनिकीकरण गरिएको हो ।
जनकनन्दिनी गाउँपालिका वडा नम्बर २ का वडाध्यक्ष अब्दुल मालिक अतिथिहरुलाई स्वागत गरेका थिए।
सो क्रममा गाउँपालिकाकी उपाध्यक्ष कमला सहगलले चालु आर्थिक वर्षको लागि बजेट तथा नीति कार्यक्रम प्रस्तुत गरेकी थिइन् ।
गाउँपालिका अध्यक्ष दिपिन देव यादव नेता बनेर होइन, जनताको बेटा बनेर सेवा गर्नको लागि आएको उनले बताए। जनताको आवश्यकता र समस्या बुझ्दै जनकनन्दिनी गाउँपालिकाका सम्पुर्ण जनप्रतिनिधिहरु पार्टी भन्दामाथी उठेर गाउँपालिकालाई तीन वर्ष भित्रै गाउँपालिकाको प्रत्येक वडामा चार पाङ्ग्रे, कार गुड्ने बाटोको निर्माण गरेर देखाउने उनले दाबी गरेका हुन।
This will close in 20 seconds