2024-09-07
Close
2024-09-07
अप्पन जनकपुर
जनकपुरधाम । मधेश प्रदेशको राजधानी जनकपुरधामस्थित करिब २३ करोड रुपैयाँको लागतमा मधेश प्रदेश प्रहरी कार्यालय बन्ने भएको छ ।
हालको संघीय प्रहरी कार्यालय परिसरमा सुविधा सम्पन्न मधेश प्रदेश प्रहरी कार्यालय निर्माण हुन लागेको हो । उक्त कार्यालयको आज एक समारोहबीच मुख्यमन्त्री सरोज कुमार यादवले शिलान्यास गरेका छन् ।
मधेश प्रदेश प्रहरी कार्यालयका प्रमुख प्रहरी नायब महानिरीक्षक जनक भट्टराईले २३ करोड १० लाख ४३ हजार ४०७ रुपैयाँको लागतमा कार्यालयको भवन निर्माण हुने जानकारी दिए । उनका अनुसार १८ महिनामा निर्माण हुने सम्झौता गरिएको छ ।
कार्यालय शिलान्यास गर्दै मुख्यमन्त्री यादवले प्रहरी समायोजन नहुँदा प्रदेशमा आपराधिक घटना बढेको जिकिर गरे । उनले प्रदेश मातहत प्रहरी आएपछि अपराध घट्ने दावी गरे । उनले भने, प्रदेश मातहत प्रहरी आएपछि सबै सुविधा उपलब्ध गराउँछौं ।
उनले प्रहरी प्रदेश सरकार मातहत आएमा राजश्व डेढ गुणाले बढ्ने पनि बताए । प्रहरी प्रदेश मातहतमा जाँदा राजश्व घट्ने शंका नगर्न संघीय सरकारलाई विश्वास दिलाउन चाहेको उनको भनाई थियो ।
मुख्यमन्त्री यादवले प्रहरी चौकीहरुमा सवारीसाधनका लागि १५ करोड रुपैयाँ उपलब्ध गराउन लागेको बताए । उनले भने यस प्रदेशका प्रहरीलाई मेट्रेस (ओछ्याउने सामग्री) पनि छिट्टै उपलब्ध गराउँछौं ।
