2025-06-14
Close
2025-06-14
जनकपुरधाम । धनुषाको जनकनन्दिनी गाउँपालिका–४ खजुरीस्थित ऐतिहासिक काली मन्दिर परिसरमा शनिबार वृक्षारोपण कार्यक्रम सम्पन्न भएको छ । सामुदायिक प्रहरी साझेदारी कार्यक्रमअन्तर्गत आयोजित कार्यक्रममा नेपाल प्रहरी र सशस्त्र प्रहरी बलको उल्लेख्य उपस्थिति रहेको थियो ।
ईलाका प्रहरी कार्यालय खजुरीका प्रहरी इन्स्पेक्टर बबिन्द्र नेम्वाङको कमाण्डमा ७ जना प्रहरी सहभागी थिए । यस्तै, सशस्त्र प्रहरी बल खजुरी बीओपीका इन्स्पेक्टर मनोज खनालको कमाण्डमा ७ जना सशस्त्र प्रहरी परिचालित थिए ।
कार्यक्रममा वडा नं. ४ का वडाध्यक्ष दिलिप यादव, स्थानीय जनप्रतिनिधि, समाजसेवीहरु सहभागिता रहेको थियो । सहभागीहरूले मन्दिर परिसर तथा आसपासको क्षेत्रमा विभिन्न जातका बिरुवा रोपेर वातावरण संरक्षणको सन्देश दिएका थिए ।
कार्यक्रमको उद्देश्य वातावरणीय सन्तुलन कायम गर्नुका साथै समुदाय र सुरक्षा निकायबीचको आपसी समन्वय तथा विश्वास अभिवृद्धि गर्नु रहेको आयोजकहरूले जनाएका छन् ।
प्रहरी इन्स्पेक्टर नेम्वाङले समाज रूपान्तरणका लागि सिर्जनशील र सकारात्मक गतिविधिको आवश्यकता औंल्याउँदै भने, वृक्षारोपण हाम्रो तर्फबाट सकारात्मक परिवर्तनको सानो तर सशक्त प्रयास हो ।
स्थानीयहरूले प्रहरी र सशस्त्र प्रहरी बलद्वारा गरिएको वातावरणमैत्री प्रयासको प्रशंसा गरेका छन् । कार्यक्रमले जनस्तरमा वातावरणप्रतिको चेतना फैलाउने विश्वास गरिएको छ ।
