2025-07-11
Close
2025-07-11
जनकपुरधाम । जनकपुर न्यूरो हस्पिटलले शनिबार जिल्ला प्रहरी कार्यालय धनुषा परिसरमा स्वास्थ्य परीक्षण शिविर सञ्चालन गरेको छ ।
प्रहरी अधिकारी, जवान र थुनुवाहरूको स्वास्थ्य अवस्थाबारे प्रारम्भिक मूल्यांकन गर्न आयोजित एकदिने शिविरमा करिब ६० जनाको परीक्षण गरिएको हस्पिटलका प्रवक्ता संजय मण्डलले जानकारी दिए ।
स्वास्थ्य शिविरमा न्यूरो सर्जन डा. विजय राउतको नेतृत्वमा आएको चिकित्सकको टोलीले न्यूरोलोजी, अर्थोपेडिक र जेनेरल मेडिसिन अन्तर्गत परीक्षण गरेको थियो ।
डा. राउतका अनुसार अधिकांश प्रहरी जवानहरूमा घुँडासम्बन्धी समस्या देखा परेको छ । समयमै खानपिन नहुनु, निरन्तरको ड्युटी, कम आराम जस्ता कारणले सामान्य घुँडाको समस्या देखिएको हो, उनले भने ।
शिविरमा केही जवानहरूमा फंगल इन्फेक्सनसमेत देखा परेको थियो । तर, गम्भीर समस्या कसैमा पनि देखिएन, डा. राउतले स्पष्ट पारे । समयमै खानपान सुधार र सामान्य स्याहारले यी समस्या सहजै निको हुने उनले बताए ।
स्वास्थ्य परीक्षणबाट प्रहरीको भौतिक र मानसिक स्वास्थ्यप्रति संवेदनशीलता देखाउने कार्यप्रति सराहना गरिएको छ । जिल्ला प्रहरी कार्यालय धनुषा परिसरमै यस्तो सेवा पुर्याउनु सकारात्मक अभ्यास भएको जनाइएको छ ।
जनकपुर न्यूरो हस्पिटलले सामाजिक उत्तरदायित्व अन्तर्गत विभिन्न समुदाय र संस्थाहरूमाझ नियमित रूपमा यस्ता निःशुल्क शिविर सञ्चालन गर्दै आएको छ । शनिबारको शिविरले सुरक्षा निकायभित्रको स्वास्थ्य अवस्थामाथि ध्यानाकर्षण गराउनुका साथै प्रारम्भिक उपचार र परामर्शको अवसर दिएको छ ।
