जनकपुरधाम । धनुषाको हंसपुर नगरपालिकाका मेयर प्रदीप कुमार यादवले दुई वर्षअघि जनकपुरधामस्थित फैशन टेर्लसमा पैन्ट–शर्ट सिलाएर अहिलेसम्म पैसा नदिएको टेलर्स सञ्चालकले गुनासो गरेका छन् ।
नगरपालिकामा निर्वाचित भएपछि एकै पटक पाँच वटा शर्ट र तीनवटा पैन्ट सिलाएको ४३ सय र कपडाको २४ हजार ६ सय गरी २८ हजार ९ सय रुपैयाँ अहिलेसम्म मेयर यादवले नदिएको टेर्लस सञ्चालक मोहम्मद अतहरको गुनासो छ । ‘दुईवर्ष अघि मेयर साहब टेर्लसमा आउनु भयो, कपडा आफै छानेर लिनुभयो । नाप दिनुभयो, हामीले शर्ट पैन्ट बनाइदिए पछि पैसा पछि दिन्छु भनेर शर्टपैन्ट लग्नु भयो । तर, अहिलेसम्म पैसा दिनुभएको छैन्, अतहरले भने, मैले पैसाका लागि पटकपटक मेयरको घरमा मान्छे पठाउँदा आज दिन्छु भोलि दिन्छु भनेर आलटाल गर्दै आएका छन् ।
‘मेयर जस्तो मान्छेले पैसा राख्दैन भनेर विश्वास गरेर कपडा पनि मैले उधारो दिए, उनले भने, टेर्लसबाट कपडा लगेकोदेखि कहिले भेट्न आएका छैनन् । कहिलेकाहीँ बाटोमा भेट्दा हातको इसारा दिँदा पनि मेयर साहब गाडी नरोकी जानुहुन्छ । बाध्य भएर यो कुरा बाहिर ल्यानुपरेको छ । कमसे कम आफ्नो मेहनतको पैसा पाउँछु की भनेर ।
मेयर यादवसँग पैसा मगाइदिन नागरिक मिररसँग आग्रह गर्दै अतहरले भने, म पैसा माग्दा माग्दै थाकीसके, एकपटक तपाईंहरूले नै उहाँलाई भनिदिनुपर्यो ।
हंसपुर नगरपालिकाका एक कर्मचारीका अनुसार तत्कालीन प्रमुख प्रशासकीय अधिकृत केशव अधिकारीले भने, मेयर यादवलाई एउटा पैन्ट र एउटा शर्ट मात्रै सिलाउनका लागि भनेका थिए । तर, मेयर साहबले पाँच वटा शर्ट र तीनवटा पैन्ट सिलाउनुभयो । कपडा पनि टेर्लसबालासँग उधारो लिनु भयो । मेयरले हाकिमको आदेश विपरित गर्नुभयो । हाकिम पनि पालिकाबाट जानुभयो । त्यसैले पैसा बाँकी रहेको हुनसक्छ ।
