जनकपुरधाम । राष्ट्रिय स्वतन्त्र पार्टी (रास्वपा) महोत्तरीका जिल्ला सभापति शुभम कुमार यादव मधेश प्रदेशका सक्रिय तथा उदाउँदा युवा नेतामध्ये एक मानिन्छन् । सहिद परिवारबाट आएका यादव पार्टी स्थापना कालदेखि नै संगठन निर्माणमा निरन्तर सक्रिय रहँदै आएका छन् ।
मधेश प्रदेशमा पार्टीको उपस्थिति अत्यन्त न्यून रहेको समयमा, महोत्तरीमा जम्मा ५ जना सदस्य मात्र रहेको अवस्थाबाट नेतृत्व सम्हाल्दै उनले संगठन विस्तारको अभियान सुरु गरेका थिए । सीमित स्रोत–साधन र विभिन्न चुनौतीका बीच पनि उनले पालिका, वडा तथा टोल तहसम्म संगठन विस्तार गर्दै महोत्तरीलाई मधेश प्रदेशकै सक्रिय जिल्लामध्ये एक बनाउन महत्वपूर्ण भूमिका खेलेका छन् ।
नेपालकै सबैभन्दा कान्छो जिल्ला सभापतिको रूपमा जिम्मेवारी सम्हालिरहेका यादवले युवाहरूलाई राजनीतिमा आकर्षित गर्न, संगठनलाई जनतामाझ पुर्याउन र पार्टीको आधार बलियो बनाउन निरन्तर काम गरिरहेका छन् । पार्टीको कठिन समयमा समेत अग्रपंक्तिमा उभिएर संघर्ष गर्ने नेताका रूपमा उनको परिचय बनेको छ ।
राजनीतिक विश्लेषकहरूका अनुसार, महोत्तरीमा रास्वपाको वर्तमान संगठनात्मक अवस्था निर्माणमा शुभम कुमार यादवको योगदान उल्लेखनीय रहेको छ । सुरुवाती चरणमा न्यून सदस्य संख्या भएको संगठनलाई हजारौं समर्थक र कार्यकर्तासम्म विस्तार गर्न उनले नेतृत्वदायी भूमिका निर्वाह गरेका छन् ।
युवा नेतृत्व, संगठन निर्माणको क्षमता र परिवर्तनप्रतिको प्रतिबद्धताका कारण शुभम कुमार यादव आज महोत्तरी मात्र नभई समग्र मधेश प्रदेशमा समेत चर्चित युवा नेताका रूपमा स्थापित हुँदै गएका छन् । उनका समर्थकहरूका अनुसार, ५ जना सदस्यबाट सुरु भएको यात्रा आज बलियो संगठनमा रूपान्तरण हुनु नेतृत्व, मेहनत र समर्पणको परिणाम हो ।”
