2025-05-09
Close
2025-05-09
सप्तरी । सप्तकोशी नदीमा पानीको सतह बढेपछि तटबन्ध छेउका बस्तीमा उच्च सतर्कता अपनाउन आग्रह गरिएको छ ।
पानीको अत्यधिक चाप रहेको सप्तरीको हनुमाननगर कंकालिनी नगरपालिका १४ डलवा र मध्यकोशीमा रहेको वडा नम्बर १३ गोबरगाढामा ‘हाई अलर्ट’ गरिएको सप्तरीका प्रहरी प्रमुख एसपी अभिनारायण काफ्लेले जानकारी दिए ।
उक्त क्षेत्रमा सुरक्षाकर्मी परिचालन गरी कोशीको पश्चमी तटबन्धको निगरानी गर्ने कार्य भइरहेको छ । एसपी काफ्लेका अनुसार मंगलबार बिहान ११ बजे गरिएको मापनअनुसार कोशी ब्यारेज भएर २ लाख १६ हजार ८५ क्युसेक प्रतिसेकेन्डका दरले पानीको बहाव भइरहेको छ । कोशी ब्यारेजका ३२ वटा ढोका खोलिएको छ ।
पानीको सतह बढेसँगै टापु बस्ती गोबरगाढास्थित विद्यालय नजिकै कटान पुगेको छ । कटान हुन सक्ने सम्भावित जोखिमका कारण नगरपालिकाले यसअघि नै उक्त विद्यालयको छानामा रहेको जस्ता र ढोकाहरू खोलेर सुरक्षित स्थानमा राखेको छ । पानी बढेसँगै गोबरगाढाका २० घरमा पानी पसेको हनुमाननगर कंकालिनी नगरपालिकाका नगरप्रमुख वीरेन्द्र माझीले जानकारी दिए ।
यस्तै कोशीमा पानीको सतह बढेसँगै कटान हनुमाननगर कंकालिनी नगरपालिकाको वडा नम्बर १४ डलवास्थित स्परतर्फ लागेको छ । उक्त वडाका अध्यक्ष कृष्णकुमार यादवका अनुसार डलबास्थित स्परमा कटान लाग्दा स्थानीय त्रसित भएका छन् ।
कटान नियन्त्रणका लागि भारतीय कोशी योजनाका ठेकेदारहरू काम सुरु गरे पनि पानीको दबाब अत्यधिक रहेकाले नियन्त्रण हुन नसकेको वडाध्यक्ष यादवले बताए ।
