2025-06-07
Close
2025-06-07
अप्पन जनकपुर
जनकपुरधाम । नेपाली कांग्रेसका सभापति शेरबहादुर देउवाले जनकपुरधाम उपमहानगरपालिका ८ बलवाटोलमा निर्मित मैथिली भवनको उद्घाटन गरेका छन् ।
मैथिली भवन उद्घाटन समारोहमा बोल्दै उनले मधेश प्रदेशको नामकरणमा आपत्ति जनाए । उनले भने, ‘राजा जनक र जानकीको पवित्र भूमि जनकपुरधाम हो । यस प्रदेशको नाम जनक वा जानकी राख्दा हुन्थ्यो ।’
राजा जनक सानो राजा थिएन भन्दै उनले सिंगापुर, मलेसिया, कम्बोडिया जस्ता ठाउँमा समेत राजा जनकको राजधानी मान्ने गरेको बताए । थाइल्याण्डका राजाले त जनककै सन्तान पनि भन्ने गरेको उनले बताए ।
उनले मैथिली भवनको उद्घाटनअघि पत्रकारहरूसँग मधेश प्रदेशमा छिट्टै कांग्रेसको नेतृत्वमा सरकार बन्ने बताएका थिए ।
प्रदेश सरकारको लगानीमा मैथिली विकास कोषले उक्त भवन निर्माण गरेको हो । सात करोड ५० लाखको लागतमा ५ कट्ठा क्षेत्रफलमा भव्य भवन निर्माण गरिएको छ ।
यस भवनमा सांस्कृतिक सङ्ग्रहालय, पुस्तकालय, मिथिला लोक चित्रकला प्रशिक्षण केन्द्र, कला प्रदर्शनी कक्ष, श्रव्यदृश्य कार्यसम्पादन कक्ष, सेमिनार हललगायतका आधुनिक रूपमा सुविधा सम्पन्न रहेका छन् ।
