2024-04-25
Close
2024-04-25
जनकपुरधाम, ४ भदौं । जिल्ला प्रहरी कार्यालय धनुषाबाट जर्वजस्ती करणी मुद्दाका एक अभियुक्त फरार भएको प्रकरणमा चार विद्यार्थीसहित पाँच जना पक्राउ परेका छन् ।
गत विहिवार जर्वजस्ती करणी मुद्दामा सिरहाको अर्नमा घर भएका २० वर्षीय राममणी यादब पक्राउ परेका थिए । तर अनुसन्धानका लागि मुद्दा फाँटमा लगेका बेला शुक्रवार उनी फरार भए । फरार भएपछि जस जसको मोवाइलमा उनले सम्पर्क गरे, ति व्यक्तिहरुलाई प्रहरीले कल डिटेलको आधारमा पक्राउ गरेका छन् ।
पक्राउ परेका पाँचै जना सिरहा जिल्लाकै छन् । स्रोतका अनुसार पक्राउ पर्नेमा सिरहा औरहीका प्रमेश यादब, ठैगहीका सुर्यनारायण यादब, बसपिट्टाका राजकुमार यादब र अर्नमाका रामप्रकाश यादब छन् । यि चारै जना जनकपुरस्थित एक कलेजमा ओभरसियर अध्ययनरत विद्यार्थी हुन् । पक्राउ परेका एक जना फरार यादबका भिनाजु रहेको स्रोतले जनाएको छ ।
अभियुक्त फरार भएपछि एसपीदेखि प्रहरी जवानसम्मका जागिर धरापमा परेको छ । त्यसैले यि पाँचै जनालाई पक्राउ गरेर आफ्नो गल्ती ढाकछोप गर्न प्रहरी लागेका छन् । पक्राउ परेका मध्ये तीन विद्यार्थीको अहिले ओभरसियरको परीक्षा चलिरहेको छ । तर प्रहरीले परीक्षाबाट समेत बंचित गराएका छन् ।
एक अभिभावकले भने, ‘प्रहरीले आफ्नो गल्ती ढोकछोप गर्न विद्यार्थीलाई पक्राउ गरेका छन् ।’ बलात्कार गर्ने कोही अनी मुद्दा चलाउने अरुमाथि यस्तो पनि हुन्छ– ति अभिभावकको प्रश्न छ । उनले पक्राउ गरेर अनुसन्धान गर्न सकिन्छ तर आफूहरुलाई भेट्न समेत नदिएको र भित्र अनुसन्धानको नाममा अनेक खालको टर्चर गरिरहेको गुनासो पोखेका छन् ।
पक्राउ परेका पाँचै जनाले फरार भएका यादबलाई आश्रय दिएकोले मुद्दा चलाएको धनुषाका एसपी शेखर खनालले जानकारी दिए । परीक्षाबाट बंचित गर्न मिल्छ भन्ने जिज्ञासामा उनले भने– हिरासतमा पुगेपछि के के हुन्छ के के ? हिरासतमा धेरै कुराबाट बंचित हुन्छ ।’ उनका अनुसार यो प्रकरणमा धेरै प्रहरीमाथि अनुसन्धान भइरहेको र तत्कालै असई रामकुमार भण्डारीलाई निलम्बन गरिएको छ ।
This will close in 20 seconds
