2024-09-10
Close
2024-09-10
मुख्य समाचार
जनकपुरधाम,२२ चैत । धनुषा क्षेत्र नम्बर २ बाट निर्वाचित समाजवादी पार्टीका संघीय साँसद उमाशंकर अरगरियाले कोरोना संक्रमितका लागि निःशुल्क एम्बुलेन्स उपलब्ध गराउने घोषणा गरेका छन् ।
कोरोना संक्रमित आशंका गरिएको विरामीको समेत यतिबेला एम्बुलेन्सले बोक्न तयार भइरहेको छैन । यस्तो अवस्थामा साँसद अरगरियाले आफु निर्वाचित क्षेत्रका लागि कोरोना संक्रमित विरामी बोक्न निःशुल्क एम्बुलेन्स उपलब्ध गराउने घोषणा गरेका हुन् ।
ॐ शक्ति सामुदायिक अध्ययन अनुसंधान केन्द्र धनुषाको एम्बलेन्स क्षेत्र नम्बर २ का जनताका लागि निःशुल्क सेवा दिने साँसद अरगरियाले बताएका छन् । एम्बुलेन्स संचालन गरिरहेका केन्द्रका अध्यक्ष विनोद प्रसाद रोहिताले पनि साँसद अरगरियाको आग्रहमा निःशुल्क सेवा प्रदान गर्ने बताएका छन् ।
उनले कोरोना संक्रमितलाई क्वारेन्टाइन वा अस्पतालसम्म पुर्याउनुपरेमा मोवाल नम्बर ९८१२१८३२०० र ९८०४८९३६९६ मा फोन गर्न समेत क्षेत्र नम्बर २ का जनतासँग अपिल गरे । उनले भने, ‘जुनसुकै समयमा फोन गर्दा हामी एम्बुलेन्स उपलब्ध गराउँछौं ।’
साँसद अरगरियाले संकटमा परेका बेला आफु जनतासँगै रहेको समेत बताएका छन् । उनले जनतालाई परेको समस्यामा जुनसुकै बेला सकेसम्म सहयोग गर्ने बताए । केहि व्यक्तिले सामाजिक संजालमा आफुलाई बदनाम गर्न खोजेपनि जनतालाई विचलित नहुन उनले अपिल गरे ।
