2024-04-27
Close
2024-04-27
जनकपुरधाम । नेकपा एमालेका अध्यक्ष केपी शर्मा ओलीले जन्मसिद्ध नागरिकका सन्तानले वंशजको आधारमा नागरिकता पाउनुपर्ने बताउनुभएकाे छ ।
नेकपा एमाले धनुषाले सोमबार जनकपुरधाममा आयोजना गरेको बृहत् जनसभा तथा पार्टी प्रवेश कार्यक्रमलाई सम्बोधन गर्दै अध्यक्ष ओलीले जन्मसिद्ध नागरिकका सन्तानले वंशजको आधारमा नागरिकता पाउनुपर्ने एमालेको माग रहेकाे बताउनुभयाे ।
नागरिकताबिहीन नेपालीलाई नागरिकता दिलाउन एमालेले जति लडाइँ अरु कुनै पार्टीले नगरेका उहाँकाे भनाइ छ । अध्यक्ष ओलीले नागरिकता विधेयककाे सवालमा गठबन्धन सरकारले एमाले विरुद्ध भ्रम फैलाएकाे पनि बताउनुभयाे । एमालेले विधेयक रोकेको र नागरिकता नदिएको भनेर मधेसमा भ्रम छर्ने काम भएकाे भन्दै उहाँले भ्रममा नपर्न आग्रह गर्नुभयाे ।
नागरिकता विधेयक एमालेले पास गर्न दिएन भनेर गठबन्धन सरकारले चुनावकाे मुखका भाेटकाे राजनीति गरेकाे उहाँकाे भनाइ छ । एमालेलाई आराेप लगाउने तर नागरकिता विधेयक पास नगर्ने रणनीति सरकारले बनाएकाे पनि अध्यक्ष ओलीले बताउनुभयाे । उहाँले भन्नुभयाे – ‘सरकार नागरिकता विधेयक पास गर्न चाहँदैन, पास नगर्ने, रोकेर राख्ने, तनाव बढाउने, राष्ट्रिय राजनीतिलाई तनाव र द्वन्द्वतर्फ लान खोज्ने र लोकतन्त्रतर्फ हैन सरकारले यस्तै गतिविधि गरिरहेकाे छ ।’
राष्ट्रपति विद्यादेवी भण्डारीले पुर्नविचारका लागि फिर्ता पठाउनुभएकाे नागरिकता विधेयक फिर्ता हुनुपर्ने समेत अध्यक्ष ओलीले बताउनुभयाे । राष्ट्रपतिले पठाउनुभएकाे सन्देशलाई बेवास्ता गरेर गठबन्धन सरकारले दम्भ र अंहकार देखाएकाे उहाँकाे भनाइ छ ।
अध्यक्ष ओलीले मंसिर ४ काे चुनावले देशकाे भाग्य र भविष्यकाे फैसला गर्ने पनि बताउनुभयाे । साे चुनावमा एमालेले कसैसँग गठबन्धन नगर्ने तर केही ठाउँमा तालमेल भने गर्न सक्ने पनि उहाँले बताउनुभयाे । एमाले एक्लै चुनाव लड्न सक्षम रहेकाे बताउँदै अध्यक्ष ओलीले भन्नुभयाे – ‘एमाले कसैको सहारामा चल्ने पार्टी होइन, हामी एक्लै गठबन्धनविरुद्ध काफी छौं, हामीलाई कसैको सहारा चाहिँदैन,तर लोकतन्त्रमा कुनै-कुनै दललाई रेस्क्यु पनि गर्न सकिन्छ, यसका लागि एमाले खुला छ ।’
This will close in 20 seconds
