2024-10-08
Close
2024-10-08
सप्तरी । सप्तकोशी नदीमा पानीको बहाव यस वर्षकै उच्च पुगेको छ। अविरल वर्षासँगै सप्तकोशी नदीले खतराको तह पार गरेको छ । शनिबार रातिदेखि परेको पानीले सोमबार बिहान पानीको तह ४ लाख ५२ हजार ७१० पुगेको छ । अरू दिन सामान्य गतिमा रहेकोमा कोशीमा आइतबार रातिदेखि निरन्तर बहाव बढेको कोशी ब्यारेजका प्रशासकले भने ।
पानीको बहाव बढिरहेकाले अहिले कोशी ब्यारेजका ५६ मध्ये अहिले ५६ वटा ढोका खुला राखिएको छ । कोशी ब्यारेजमा अहिले खतराको संकेत रातो बत्ती बालिएको छ । कोशी ब्यारेजमा पानीको बहाव एक लाख ५० हजार काट्नेबित्तिकै सर्वसाधारणलाई सचेत गर्नका निम्ति बत्ती बाल्ने गरिन्छ ।
सप्तकोशी अहिलेसम्मको इतिहासमा सबैभन्दा बढी सन् १९६८ मा सात लाख ८८ हजार २०० क्युसेक पुगेको थियो । सन् १९८७ मा ५ लाख २३ हजार ७७१ क्युसेक पुगेको थियो ।
कोशी ब्यारेजले सुरुवातका वर्षमा कोशी नदीले झन्डै आठ लाख क्युसेक पानीको क्षमता धाने पनि त्यसपछिका वर्षहरूमा पानीको लेभल घटदै गएको पाइन्छ । पछिल्लो समय कोशी ब्यारेजभन्दा माथिल्लो भागमा बालुवा थुप्रिएका कारण थोरै पानीको बहावमा पनि खतरा हुनेगर्छ ।
२०६५ भदौ–२ गते एक लाख ६८ हजार क्युसेक पानीको बहाव हुँदा सप्तकोशी नदीले पूर्वी तटबन्ध भत्काएको थियो । त्यति वेला कोशीले पूर्वी तटबन्ध भत्काउँदा कोशी गाउँपालिकाका चारवटा मानव बस्तीमा पसेको थियो । उक्तः बाढीले ७ हजार ५ सय ६३ परिवार विस्थापित भएका थिए ।
