2024-05-04
Close
2024-05-04
जनकपुरधाम । सर्लाहीको मलँगवामा लगाईएको कर्फ्यूको कारण जनजीवन कष्टकर हुन थालेपछि कर्फ्यूको समय घटाएको हो ।
जिल्ला प्रशासन कार्यालय सर्लाहीमा सोमबार (आज) बसेको सुरक्षा समिति तथा सर्वपक्षिय बैठकबाट कर्फ्यूको कारण आम नागरिकको दैनिकीमा जटिलता उत्पन्न हुन थालेपछि कर्फ्यूको समय घटाएको हो ।
सर्लाहीका प्रमुख जिल्ला अधिकारी ईन्द्रदेव यादवको सँयोजकत्वमा बसेको सर्वपक्षिय बैठकबाट अब मलँगवामा राती ८ बजेदेखि बिहान ४ बजेसम्म मात्र ८ घण्टा कर्फ्यू आदेश लागू हुने भएको छ । यसअघि २४ सै घण्टा कर्फ्यू लागेकोमा स्थानीयहरुको दैनिकी कष्टकर भएको थियो । खेतमा समेत जान नपाउने, बाहिर निस्कन नै नपाउने गरी कर्फ्यू भएपछि राजनीतिक दलहरुको आग्रहमा कर्फ्यू समय घटाएको हो ।
आज राति ८ बजेदेखि विहान ४ बजेसम्म कर्फ्यू रहनेछ ।अर्को आदेश वा व्यवस्था नहुन्जेलसम्मका लागि राति ८ बजेदेखि बिहान ४ बजेसम्म कर्फ्यू आदेश जारी गरिएको प्रमुख जिल्ला अधिकारी यादवले जानकारी दिए । यो आदेशसँगै आजदेखि दिनमा कर्फ्यू हटेको छ ।दिनको समयमा कर्फ्यू आदेश निष्कृय गरिएको भएतापनि सर्वसाधारणको सुरक्षामा पर्न सक्ने सम्भावित जोखिमको मध्यनजर गर्दै साविक मलंगवा नगरक्षेत्र भित्र कुनै प्रकारको भेला हुन, जुलुस गर्न, बैठक वा प्रदर्शन वा पोष्टर, पर्चा जस्ता प्रचार सामग्री टाँस्न वा लेख्न निषेध गरिएको छ ।
सामाजिक सञ्जालमा सामाजिक सद्भाव बिगार्ने खालका हल्ला एवम् अफवाह फैलाउने व्यक्तिहरुको पहिचान गरी साइबर अपराध गरेको अभियोगमा कानूनबमोजिम कारबाही गर्ने चेतावनी दिइएको छ ।
असोज ४ गते साँझ मूर्ति सेलाउने क्रममा झडप भएको थियो । झडपका बेला एक युवकमाथि छुरा प्रहार गरिएको थियो । तोडफोड र ढुंगामुढा भएपछि प्रहरीले समेत स्थिति नियन्त्रणमा लिन नसक्ने अवस्था देखेर प्रशासनले राति सोही दिन राति १० बजेबाट अनिश्चितकालीन कर्फ्यू आदेश जारी गरेको थियो ।
This will close in 20 seconds
