2024-09-17
Close
2024-09-17
बिपिन यादव जनकपुरधाम । विद्याकीदेवी सरस्वतीको पूजा नजिकिएसँगै धनुषाको विदेह नगरपालिका ६ तिनकौरिया चोकका कालिगड (मूर्तिकार) सत्यनारायण पण्डितलाई सरस्वतीका मूर्ति बनाउन भ्याइनभ्याइ भएको छ ।
वसन्तपञ्चमी अर्थात सरस्वती पूजाको दिनका लागि यहाँका कालिगडलाई विभिन्न किसिमका मूर्ति बनाउन भ्याइनभ्याइ भएको हो ।
वसन्तपञ्चमीको पूजामा सरस्वतीको मूर्तिबाट प्रशस्त आम्दानी हुने भएकाले जिल्लाका कालिगड मूर्ति बनाउन व्यस्त भएका सत्यनारायण पण्डितले बताए ।
विद्यालयहरुमा सरस्वतीको मूर्तिको माग बढी भएकाले यहाँका कालिगड मूर्ति बनाउन व्यस्त रहेका उनको भनाइ थियो ।
मूर्तिको आकार हेरेर मूल्य तोकिने भए पनि एउटा मूर्तिलाई रुपैयाँ १ हजारदेखि ७ हजारसम्ममा पर्ने कालिगड सत्यनारायण पण्डितले बताए ।
गणेश पूजा, लक्ष्मी पूजा, कृष्ण जन्माष्टमी, विश्वकर्मा पूजा र दुर्गा पूजालगायत पर्वमा मूर्ति बेचेर करिब रुपैया १ लाखसम्म आम्दानी हुने उनले जानकारी दिए ।
“विशेष समयमा मूर्तिको माग बढी आउने भएकाले घरपरिवारका सबै सदस्य काममा लाग्ने गर्दछन्” मूर्तिकार पण्डितले भने ।
उनका अनुसार सरस्वती पूजाका लागि यसअघिका वर्षभन्दा यस वर्ष बढी माग आएको छ । उनले वार्षिक रुपैयाँ २ लाखसम्म आम्दानी हुने गरेको बताए ।
उनका अनुसार अधिकांश निजी तथा सामुदायिक विद्यालयले सरस्वती पूजाका लागि मूर्ति बनाउन दुई महिना अघिदेखि कालिगडलाई सूचना दिने गरेका छन् ।
विद्यालय बाहिर टोलबस्तीमा गरिने पूजाको लागि भने पूजाको एकदिन अगाडि बिक्री स्थलमा गएर आफ्नो आर्थिक सामथ्र्य अनुसार सरस्वतीको मूर्ति छानेर खरिद गर्ने गरिएको स्थानीयवासी राजेश साहले बताए ।
मूर्तिको आकार र प्रयोग गरिएका सामग्रीका आधारमा प्रतिमूर्ति रुपैयाँ १ हजारदेखि रू ८ हजारसम्म मूल्य पर्ने कालिगड सत्यनारायणले बताए ।
यो पेसाबाट आफु सन्तुष्ट रहेको भन्दै यसबाटै सहज रुपमा जीविकोपार्जन भइरहेको उनको भनाइ थियो ।
