सिरहा । सहिद हेमनारायण यादवको २० औं स्मृति दिवस विभिन्न कार्यक्रम गरी मनाईएको छ ।

स्मृति दिवसको अवसरमा आयोजना गरिएको रक्तदान कार्यक्रममा २० जनाले रक्तदान गरेका छन् । त्यससँगै प्रादेशिक अस्पताल सिरहामा उपचाररत रोगीहरुलाई स्मृति दिवसको अवसरमा फलफूल वितरण गरिएको छ । सदरमुकाम सिरहाको हेमनारायण चौकमा रहेको सहिद साँसद हेमनारायण यादवको पूर्णकदको शालिकमा माल्यापर्ण गरिएको थियो ।

सिरहाका कम्युनिष्ट नेता हेमनारायण यादवको २०६० माघ १९ मा उनको हत्या भएको थियो । हत्या भएको तीन वर्षपछि यादवलाई सरकारले सहिदसमेत घोषणा गरेको थियो ।

तीनै सहिद यादवको बिहीबार नेकपा एमालेले २० औं स्मृति दिवस मनाएको छ । सिरहा सदरमुकाममा सहिद यादवको सालिक छ । चोकको नाम पनि ‘हेमनारायण चोक’ राखिएको छ । उनको सालिकमा सिरहा नगरपालिकाका मेयर समेत रहेका जेठो छोरा डा. नवीन यादव र जिल्लाभरका एमाले नेता तथा निर्वाचित जनप्रतिनिधिहरुले माल्यार्पण गरी श्रद्धाञ्जली दिएका छन् ।

सहिद यादवको स्मृति दिवस मनाउन प्रायः एमालेका ठूला नेताह आउने गरेपनि यस पटक एमाले पार्टीका शीर्षस्थ नेताहर आएनन् । एमाले अध्यक्ष केपी शर्मा ओली र तत्कालीन एमाले महासचिव तथा अहिले नेकपा एकीकृत समाजवादीका अध्यक्ष रहेका माधव कुमार नेपाल पनि पटक–पटक सहिद यादवको श्रद्धाञ्जली सभामा सहभागी भएका थिए । तर, यो पटक पार्टी केन्द्रबाट कुनै पनि नेता श्रद्धाञ्जली दिन आएनन् ।

मधेसका प्रभावशाली नेता थिए हेमनारायण यादव । एमालेबाट सिरहा क्षेत्र नं. ४ बाट प्रतिनिधि सभा सदस्यका उम्मेदवार बनेका थिए । १९ हजार २ सय ३५ मत प्राप्त गरी प्रतिनिधिसभा सदस्यमा विजयी भएका थिए । तर, हत्या भएको २० वर्ष बितिसक्दा पनि घटनामा संलग्नलाई कारबाहीको दायरामा ल्याएको छैन ।

एमाले महासचिव रहेका बेला माधवकुमार नेपालले सिरहामै आएर श्रद्धाञ्जली सभामा भनेका थिए, ‘हत्यारा पातलो पर्दाको पछाडि छन् । तर, सरकारमा नभएकाले अगाडि ल्याउन समस्या भयो । छिट्टै हत्यारालाई कानूनको कठघरामा उभ्याउँछौं ।’

हुन त नेता नेपाल अहिले एमालेमा छैनन् । तर, एमालेमै रहेका वेला उनी प्रधानमन्त्री भएका थिए । तर, हत्यारालाई पर्दा पछाडिबाट अगाडि ल्याएर कानून कठघरामा उभ्याएनन् । एमाले अध्यक्ष ओली प्रधानमन्त्री हुँदा पनि यादवका हत्यारालाई कारबाही गर्न चासो देखाएनन् ।

तैपनि एमाले नेताहरुले सहिद यादवको हत्यारालाई कारबाही गर्ने प्रतिबद्धता गर्न छाडेका छैनन् । एमालेले पटक पटक सरकारको नेतृत्व गरे पनि हत्यारा कारबाहीको दायरा नआउँदा एमाले नै हत्याराको बचाउमा लागेको धेरैको गुनासो छ ।

बुवाको हत्यारालाई अझै कारबाही नभएकोमा मेयर डा नवीन दुःख व्यक्त गर्छन् । उनी भन्छन्, ‘माधवकुमार नेपालजीले अपराधी पर्दाको पछाडि रहेको भन्नुभएको थियो । त्यसैले पनि प्रधानमन्त्री भएको बेला उहाँलाई भेट्न पनि पुगेको थिएँ । तर उहाँले केही पनि गर्नुभएन ।’

उनका अनुसार हत्याको विषयमा छानबिन गर्न बनेको समितिले नेपाली सेना चोहर्वा ब्यारेकका कर्णेल बाबुकृष्ण कार्कीले नै घटना घटाएको भनिसकेको छ । संसदीय अनुगमन टोलीले पनि हत्यामा कर्णेल कार्कीकै संलग्नता रहेको भन्ने सबै प्रमाण सार्वजनिक गरिसक्दा पनि कारबाही भएको अवस्था छैन । ‘कानूनको कार्यान्वयन पक्ष कमजोर भएकै कारण अहिलेसम्म न्याय पाउन सकेको छैन’, उनले भने ।

सम्बन्धित

पत्रकार यादवको घटनामा ४ जनामाथि मुद्दा दर्ता, एक पक्राउ, तीन फरार

कमला नगरपालिकाको एम्बुलेन्स महिनौंदेखी मेयरको घरमा, उपमेयर खोज्दै एम्बुलेन्स

सुधारगृहमा युवकको मृत्यु : कुटेर हत्या गरिएको परिवारको आरोप

कार्यकर्तालाई इमानदार बन्न एमाले अध्यक्ष ओलीको आग्रह

प्रहरीकै संलग्नतामा हिरासत छल्न अभियुक्तलाई राम जानकी हस्पिटलमा होटलको सुविधा

सुहाङ नेम्वाङले आज सांसद पदको शपथ लिँदै

जनकपुर : पुलचोकमा बौलाहा कुकुरले टोकेर ६ वर्षीया बालिकाको मृत्यु

जसपा नेपाल उपेन्द्र यादवको प्राइभेट लिमिटेड कम्पनी हाे : उपमहासचिव प्रदीप यादव