2025-06-11
Close
2025-06-11
अप्पन जनकपुर
जनकपुरधाम । मधेश प्रदेशको स्वास्थ्य तथा जनसंख्या मन्त्रालय अस्तव्यस्त छ । रकम लेनदेनको आधारमा कार्यालय प्रमुखहरूलाई तान्ने र पठाउने काममा बिचौलियाहरू हाबी भएपछि १ अर्बभन्दा बढिको औषधि र स्वास्थ्य उपकरण खरिद हुन सकेको छैन ।
बजेट हुँदाहुँदै पनि खरिद गर्न नसकेपछि सर्वसाधारण निस्शुल्क औषधि र स्वास्थ्य उपचार सेवाबाट बञ्चित भएका छन् । मधेश प्रदेशको राजधानी जनकपुरधाममा २०७६ सालमा स्थापना भएको प्रदेश जनस्वास्थ्य प्रयोगशाला अहिले थलापरेको छ ।
संघीय राजधानी काठमाडौंको टेकुमा रहेका जनस्वास्थ्य प्रयोगशालाले काज फिर्ता बोलाएको झोाकमा निमित्त निर्देशक प्रणवकुमार यादवले गएको जेठ ८ गते रमाना लिएकै दिन १८ करोडभन्दा बढिको टेन्डर रद्द गरेपछि त्यहाँ ठूलो चुनौती उत्पन्न भएको हो ।
प्याथोलोजीमा प्रयोग हुने औषधि, केमिकल, किट र उपकरण खरिद हुन नसकेकै कारण बिरामीहरू समस्यामा परेका छन् । बजेट हुँदाहुँदै पनि आवश्यक सामग्री खरिद हुन नसकेकै कारण निजी प्याथोलोजीको तुलनामा तीन गुणा सस्तो, ज्येष्ठ नागरिक र दीर्घरोगीहरूलाई दिँदै आएको निस् शुल्क सेवा र मधेशको १ सय ३६ वटै पालिकामा खोलिएका प्रयोगशालाहरु बन्द हुने अवस्था पुगेका छन् ।
यो जनस्वास्थ्य प्रयोगशालाजस्तै मधेश प्रदेशको आठै जिल्लामा रहेका प्रादेशिक अस्पतालहरूको अवस्था झनै दयनीय छ । निहित स्वार्थ पुर्तिका लागि मन्त्रालयको नेतृत्वले निर्देशक तान्ने र पठाउने समस्याले गर्दा प्रदेश स्वास्थ्य व्यवस्थापन आपूर्ति केन्द्रले समयमै औषधि खरिद गर्न नसकेकै कारण सेवाग्राहीले अस्पतालबाट निस् शुल्क औषधि पाउनसकेका छैनन् ।
प्रदेश सरकारले ७२ करोड बजेट विनियोजन गरेपनि प्रदेश स्वास्थ्य व्यवस्थापन आपुर्ति केन्द्रले अहिलेसम्म एक रूपैयाँको पनि औषधि उपकरण खरिद गर्न सकेको छैन् ।
जनतासाँग प्रत्यक्ष सरोकार राख्ने मधेशका स्वास्थ्य संस्थाहरूमा एकातर्फ यस्तो समस्या छ भने अर्कोतर्फ कमिसनको लालचमा बजेटलाई टुक्रयाएर सामग्री खरिदका लागि आर्थिक वर्षको अन्त्यमा ८ वटा अस्पताललाई दुई÷दुई करोड पठाउने तयारी छ ।
आफूसँग ठूलो बजेट हुँदाहुँदै पनि स्वास्थ्य तथा जनसंख्या मन्त्रालयले संघ सरकार र दातृ संस्थालाई औषधि आपुर्तिका लागि गुहारेको छ ।
