जनकपुरधाम । महिला हिंसा रोक्ने हो भने प्रहरी चौकीदेखि घर–घरसम्म हाम्रो आवाज पुग्नुपर्छ, भन्ने अठोट बोकेकी रौतहटकी प्रहरी सहायक निरीक्षक (असई) रागनी कुमारी यादवले देशभरिका हजारौँ प्रहरी कर्मचारीलाई उछिनेर सर्वोत्कृष्ट प्रहरी–२०८१/८२ को उपाधि जितेकी छिन् ।
लैङ्गिक हिंसा विरुद्धको १६ दिने अभियानको समापन समारोहमा प्रहरी महानिरीक्षक दानबहादुर कार्कीले उनलाई नगद ४० हजार रुपैयाँ, प्रशंसा-पत्र र ट्रफी प्रदान गर्दै सम्मान गरेका छन् ।
ईलाका प्रहरी कार्यालय गरुडामा दरबन्दी भएर हाल जिल्ला प्रहरी कार्यालय रौतहटमा कार्यरत रागनीले महिला, बालबालिका तथा ज्येष्ठ नागरिक सेवा केन्द्रको जिम्मेवारी सम्हाल्दै हिंसा पीडितलाई तत्काल राहत, कानुनी सहायता र मनोविमर्श सेवा दिएर सफलता हात पारेकी हुन् ।
उहाँले हरेकी हरेक उजुरीलाई केवल फाइल बनाएर राख्नुभएन, पीडितको जीवन फर्काउने अभियान बनाउनुभयो, पुरस्कार छनोट समितिका एक सदस्यले भने ।
रागनीको सफलताले मधेशकी एक साधारण परिवारकी छोरीले पनि देशकै उत्कृष्ट प्रहरी बन्न सक्छिन् भन्ने सन्देश दिएको छ । उनले पुरस्कार थाप्दै भनिन्, यो सम्मान मेरो मात्र होइन, हरेक हिंसा पीडितको आवाज बनेर लड्ने सम्पूर्ण प्रहरी टोलीको हो ।
यस्तै, दोस्रो स्थान हात पार्ने प्रहरी जवान शान्ता खत्री हाल कपिलवस्तु, दरबन्दी अर्घाखाँचीको बालकोट चौकीलाई ३० हजार तथा तेस्रो हुने प्रहरी हवलदार उमा तामाङ सिन्धुलीलाई २० हजार रुपैयाँसहित सम्मान गरिएको छ ।
प्रहरी नायब निरीक्षक पूर्णिमा थापा र प्रहरी सहायक निरीक्षक साजना प्रसाईँले जनही १० हजारको सान्त्वना पुरस्कार पाएका छन् ।
पुरस्कार गत आर्थिक वर्ष २०८१/८२ मा देशभरका महिला–बालबालिका सेवा केन्द्रहरूमा कार्यरत प्रहरी कर्मचारीको कार्यसम्पादन मूल्याङ्कन गरेर दिइएको हो ।
