2024-04-25
Close
2024-04-25
विपिन कुमार यादव ,जनकपुरधाम : पछिल्लो एक महिनादेखि जनकपुरधाम उपमहानगरपालिका फोहोरमय बनेको छ। उपमहानगरपालिका कार्यालयले नगर क्षेत्रभित्रको फोहोर नउठाएपछि मुख्य चोकहरु, गल्ली र पर्यटकीय स्थानहरुमा फोहोर जथाभावि थुपारिएका छन्।
नगरभरीको फोहोर व्यवस्थापन तर्फ उपमहानगरपालिका कार्यालयले चासो नदेखाएपछि मंगलबार विहान युवाहरुको समुहले रामानन्द चोकदेखि मुख्य बजार क्षेत्रको फोहोर आफैँले संकलन गरि उपमहानगरपालिकाको ढोकामा थुपारेका छन्। युवाहरुको समुहले रामानन्द चोकदेखि, अस्पताल रोड, जानकी चोक, जनक चोक, शिव चोक हुँदै बजार क्षेत्रमा दुईसातादेखि फालिएको फोहोरका डंगुरहरु उठाएर ट्रयाक्टरमा हाली उपमहानगरपालिका कार्यालय अगाडी थुपारेको हो।
जनप्रतिनिधि निर्वाचित भएर आएको तीन वर्ष बितिसक्दा पनि नगरक्षेत्रको फोहोर व्यवस्थापनका लागि उचित ठाउँसमेत निर्धारण गर्न नसक्नु ठूलो दुर्भाग्य रहेको युवा अगुवा हरुले बताएका छन्। नगरलाई सफा सुन्दर राख्न भाषण दिएर मात्र हुदैँन्, काम पनि गर्नुपर्छ,’ युवा अगुवाले भने ‘वहाँहरुलाई आफ्नो जिम्मेवारी बोध होस् त्यसका लागिनै उपमहानगरपालिकाको ढोकामा फोहोर थुपारेका हौं।’
उपमहानगरपालिका कार्यालयमा १ सय १५ जना सफाईकर्मचारी छन्। फोहोर उठाउन साना ठूला गरी १२ वटा ट्याक्टर र टिपर पनि छ। तर, पनि नगरमा फोहोरको समस्या विकराल छ। फोहोर फाल्ने ठाउँनै व्यवस्थापन हुन नसक्दा समस्या आएको उपप्रमुख रिता झा बताउँछिन्। यस अघि फोहोर फाल्दै आएको ठाउँ निजी भएको प्रमाणित भयो र त्यहाँ विरोध पनि भयो त्यसपछि अर्को ठाउँ निर्धारणनै गर्न सकिएको छैन्’ उपप्रमुख झाले भनिन्, जहाँ फोहोर व्यवस्थापन गर्न खोज्छौं त्यहिं स्थानीयले विरोध सुरु गर्छन् यस्तोमा हामीलाई पनि निकै गाहे परेको छ।’उपमहानगरपालिका कार्यालयले ल्यान्डफिल साइट बनाउन नसकेपछि एसियाली विकास बैंकले अनुदान दिएको ४८ करोड रुपैयाँ गत वर्ष फिर्ता गएको हो।
This will close in 20 seconds
