सिरहा । कृषि तथा पशुपन्छी विकासमन्त्री डा. मदन प्रसाद परियारले कृषि उत्पादन वृद्धि गर्दै देशमै रोजगारी सिर्जना गर्नु आजको प्रमुख आवश्यकता रहेको बताएका छन् ।
सिराहा निर्वाचन क्षेत्र नं २ अन्तर्गत औरही चौकमा आज आयोजित ‘किसानसँग कृषिमन्त्री भेटघाट तथा सम्मान कार्यक्रम’लाई सम्बोधन गर्दै मन्त्री परियारले युवा रोजगारीको खोजीमा विदेश पलायन भइरहेकाले गाउँघर युवाविहीन बन्दै गएकोप्रति चिन्ता व्यक्त गरे ।
‘६० प्रतिशतभन्दा बढी जनसङ्ख्या कृषि क्षेत्रमा निर्भर छ, तर युवा रोजगारीको खोजीमा विदेशिँदा गाउँमा उत्पादन घट्दै गएको छ’, मन्त्री डा. परियारले भने, ‘अब आफ्नै ठाउँमा कृषि उत्पादन बढाएर यही रोजगारी सिर्जना गर्नु हाम्रो सबैभन्दा ठूलो चुनौती हो । किसानलाई उत्पादनदेखि बजारीकरणसम्म सुरक्षित बनाउने, आधुनिक प्रविधिमा पहुँच बढाउने र कृषि क्षेत्रमा युवालाई आकर्षित गर्ने नीति सरकारले अघि बढाइरहेको छ ।’
मन्त्री डा. परियारले देशको कूल गार्हस्थ उत्पादनमा कृषि क्षेत्रको महत्वपूर्ण योगदान रहेको भए पनि यो क्षेत्र विभिन्न समस्या र चुनौतीसँग जुधिरहेको उल्लेख गर्दै भने, ‘स्वदेशी उत्पादनलाई संरक्षण नगरी आत्मनिर्भर अर्थतन्त्र निर्माण सम्भव हुँदैन् । त्यसैले आयात प्रतिस्थापन, उत्पादन लागत घटाउने र किसानले मेहनतको उचित मूल्य पाउने व्यवस्था गर्न सरकार प्रतिबद्ध छ ।’
द काउन्सिल अफ जेनजी मधेश प्रदेश संयोजक शिव यादबले उखु किसानको चाहनाअनुसार उखुको प्रोत्साहन अनुदान उपलब्ध गराउन सफल भएको जानकारी दिए ।
उनका अनुसार पछिल्लो समयमा एमाले र काँग्रेस नेतृत्वको सरकारले उखु किसानको अनुदान रकम ७० बाट घटाएर ३५ रुपैयाँ बनाएको थियो । यसले गर्दा पछिल्लो समयमा किसानहरु आन्दोलन गर्दैआएका थिए ।
जेनजी अगुवाहरुको पहलमा सरकारले उखु प्रोत्साहन अनुदान ७० रुपैयाँ कायम गरेको छ ।
कार्यक्रममा सहभागी स्थानीय अगुवा कृषकले भारतीय कृषि उत्पादनले नेपाली बजार ओगट्दा स्वदेशी किसान मारमा परेको गुनासो गरेका थिए ।
स्थानीय जेनजी अगुवा सन्तोष कुमार यादवको अध्यक्षतामा भएको उक्त कार्यक्रममा सहभागी भएका स्थानीय बिज्ञ तथा किसानहरुले नेपाली कृषि उपजको बजारीकरण, मूल्य सुनिश्चितता र किसानमैत्री नीति आवश्यक रहेको भन्दै मन्त्रीसमक्ष माग राखेका थिए । जेनजी युवाको आयोजनामा सम्पन्न कार्यक्रममा स्थानीय किसान, जनप्रतिनिधि, युवा तथा सरोकारवाला निकायका प्रतिनिधिको सहभागिता रहेको थियो ।
