जलेश्वर । महोत्तरीको मटिहानी गान्धीगल्ली सीमा ईलाकामा सशस्त्र प्रहरी बल, नेपालको टोलीले विभिन्न नाम र परिमाणका १६९४ वटा प्रतिबन्धित लागू औषधका ईन्जेक्सनहरु सहित एक जनालाई पक्राउ गरेको छ । मटिहानी नगरपालिका-८ स्थित गान्धिगल्ली ईलाकामा बोर्डर आउट पोष्ट मटिहानीबाट सशस्त्र प्रहरी नायव निरीक्षक प्रेम बहादुर भुजेलको कमाण्डमा खटिएको चेक प्वाईन्ट डिउटीको टोलीले भारतबाट नेपालतर्फ आउँदै गरेका व्यक्तिहरुलाई चेकजाँच गर्ने क्रममा महोत्तरी जिल्ला मटिहानी-२ बरदाहा स्थाई ठेगाना भएका बर्ष ५२ का अनवर शेखको साथबाट प्रतिबन्धित लागूऔषध डाईजापाम ईन्जेक्सन ५५६ वटा, प्रोमेन्थाजाईन ईन्जेक्सन ६४० वटा र ब्रुफ्रेनरफिन ईन्जेक्सन ४९८ वटा फेला पारी पक्राउ गरिएको सशस्त्र प्रहरी बल नेपाल नं. ९ गण हेड क्वार्टर महोत्तरीले जनाएको छ । शेखले भारतबाट उक्त प्रतिबन्धित ईन्जेक्सनहरु निलो झोलामा बोकी ल्याएका थिए । सशस्त्र प्रहरीको टोलीलाई देख्ने बित्तिकै भाग्न खोजेका उनलाई तत्काल नियन्त्रणमा लिई चेकजाँच गर्दा ठूलो परिमाणमा नेपालमा प्रतिवन्धित ईन्जेक्सनहरु फेला परेको हो ।
पक्राउ परेका व्यक्तिलाई बरामद गरिएका प्रतिबन्धित लागू औषधसहित थप अनुसन्धान र कारवाहीका लागि जिल्ला प्रहरी कार्यालय महोत्तरी, जलेश्वरमा बुझाइएको गणले जनाएको छ ।
This will close in 20 seconds