2025-04-29
Close
2025-04-29
सिरहा । सिरहा नगरपालिकाले पब्लिकेशन तोकेरै पाठ्यपुस्तक लागू गर्न गरेको निर्णय र जारी गरेको परिपत्र कार्यान्वयनमा उच्च अदालतले रोक लगाएको छ । उच्च अदालत, राजविराज इजलासले आइतबार यसलाई कार्यान्वयन नगर्नू नगराउनू भनी अन्तरिम आदेश दिएको हो ।
न्यायाधीशद्वय सरला कुमारी पाण्डे र माधव धितालको संयुक्त इजलासले दिएको अन्तरिम आदेशमा सिरहा नगरपालिकाले तोकिएकै पब्लिकेशनको किताब अनिवार्य प्रयोग गर्न २०८१ चैत १८ मा गरेको निर्णय र चैत २० मा जारी गरेको सूचना रिट निवेदनको अन्तिम टुंगो नलागेसम्म कार्यान्वयन नगर्न उल्लेख छ ।
नगरपालिकाले नेपाली, अंग्रेजी, अनिवार्य गणित, विज्ञान तथा प्रविधि र सामाजिक अध्ययन किताब तक्षशिला, जनक शिक्षा सामग्री केन्द्र, टाइम्स, वेदान्त, विद्यार्थी र रिडमोर पब्लिकेशनको मात्रै प्रयोग गर्न आदेशात्मक निर्देशन जारी गर्दै आएको थियो । नगरपालिकाले यसलाई नमान्ने विद्यालयलाई कारबाहीको चेतावनी पनि दिँदै आएको थियो ।
जबकि शिक्षा नियमावली, २०५९ को नियम ६ (क) मा नेपाल सरकारबाट स्वीकृत कुनै पब्लिकेशनको पाठ्यपुस्तक प्रयोग गर्न पाइने प्रावधान छ । पालिकाको यस्तो परिपत्रपछि यसको विपक्षमा प्याब्सन सिरहाको तर्फबाट भरतकुमार यादव उत्प्रेषणयुक्त निषेधाज्ञाको माग गर्दै रिट निवेदन लिएर उच्च गएका थिए ।
