जनकपुरधाम । जनमत पार्टीका अध्यक्ष डा. सीके राउत प्रहरीको घेराबन्दीमा परेका छन् ।
आइतबार भइरहेको उपनिर्वाचन अन्तर्गत बाराको निर्वाचन क्षेत्र नम्बर–२ स्थित पचरौताको वडा नम्बर–७ मा रहेको बेनौली बजारमा अध्यक्ष राउत प्रहरीको घेराबन्दीमा परेका हुन् ।
प्रहरीले डाक्टर राउतलाई घेरावन्दीमा पारेको भन्दै जनमतका कार्यकर्ताहरूले प्रहरीबिरूद्ध नाराबाजी गरेका छन् ।आफ्नो पक्षका उम्मेदवारलाई जिताउन खटेका राउतलाई बाटोमै प्रहरीले रोकेपछि उनी आक्रोशित बनेका छन् ।
प्रहरी प्रशासनको निगरानीमा आधा दर्जन बुथ कब्जा गरिएको डाक्टर राउतले आरोप लगाएका छन् ।
उनले प्रश्न गर्दै भने, ‘निर्वाचन आयोगबाट अनुमति प्राप्त गरेर आएका कुनै पार्टीको राष्ट्रिय अध्यक्षलाई यसरी घेरावन्दीमा पार्ने ? यस्तो अवस्थामा कसले स्वतन्त्र निर्वाचन गरेको होला ?’
उनले आफूलाई दुई दर्जन प्रहरीले घेरावन्दीमा पारेको आरोप लगाए । मतदानस्थलहरुको माहौललाई त्रसित बनाइएको उनको दाबी छ । उनले मतदानको केही समय बाँकी रहेको बेलामा जसपाले ठाउँ ठाउँमा धाँधली गरिरहेको आरोप लगाएका छन् ।
ईलाका प्रहरी कार्यालयका प्रमुख डिएसपी प्रदीप बहादुर क्षेत्रीका अनुसार भिड लिएर हिँडेकोले केही समय सोधपुछ गरिएको जानकारी दिए ।
