2025-07-09
Close
2025-07-09
जनकपुरधाम/जेष्ठ ५ गते । हामी एकजना जुझारु, समर्पित र प्रतिभाशाली पत्रकार सिबेन्द्र रोहिता यादवको प्रथम पुण्यतिथिमा उहाँप्रति गहिरो श्रद्धाञ्जली अर्पण गर्दैछौं । ठीक एक वर्षअघि यही दिन, जनकपुरधामको थापा चौकमा भएको दु:खद सवारी दुर्घटनाले मधेशी पत्रकारिता क्षेत्रले एक उज्यालो तारा गुमायो ।
सिबेन्द्र रोहिता मकालु खबरका मधेश प्रदेश प्रमुख मात्र नभई राजधानी जनकपुर सञ्चालकका रूपमा पनि क्रियाशील हुनुहुन्थ्यो । सत्यका पक्षमा निर्भीकता, आमजनताको आवाजलाई मुखर बनाउने क्षमता, र विशिष्ट लेखनशैलीले उहाँलाई मधेशी पत्रकारितामा अलग पहिचान दिलायो । सामाजिक न्याय, राजनीतिक विकृति, र मधेशी समुदायका मुद्दा उहाँका लेखनका केन्द्रबिन्दु थिए ।
कम उमेरमै पत्रकारिता क्षेत्रमा विशिष्ट छवि बनाएका रोहिता युवापुस्ताका लागि प्रेरणाका स्रोत थिए । उहाँको विचार, व्यवहार र कार्यशैलीले थुप्रैलाई छुने र परिवर्तन गर्ने काम गर्यो । सरल, मिलनसार र इमानदार व्यक्तित्वले उहाँलाई जनमानसमा अत्यन्त प्रिय बनाएको थियो । जनताको बीचबाट उठेर पत्रकारिता गरेका रोहिताका समाचारहरू जनताको धडकन बोल्थे ।
आज उहाँ हामीबीच हुनुहुन्न, तर उहाँका शब्द, सोच र योगदान सधैं जीवित रहनेछन् । हामी उहाँप्रति गहिरो श्रद्धाञ्जली अर्पण गर्दै पत्रकारितामा देखाउनुभएको सत्यको यात्रालाई सम्झन्छौं ।
सिबेन्द्र रोहिताको असामयिक निधनले हामीलाई गहिरो शून्यता दिएको छ । तर , उहाँले देखाएको बाटो जुन सच्चाइ, निर्भीकता र जनउत्तरदायित्वमा आधारित थियो। त्यो बाटो हामी सबै पत्रकारका लागि प्रेरणाको दीप बनेर सदैव जलिरहनेछ ।
हार्दिक श्रद्धाञ्जली सिबेन्द्र रोहिता । तपाईं सधैं हाम्रो स्मृतिमा रहनु हुनेछ ।
