2024-05-05
Close
2024-05-05
अप्पन जनकपुर
जनकपुरधाम । नेकपा एमालेका नेता कार्यकर्ताहरूले जनकपुरधाममा प्रहरी प्रशासनविरुद्ध विरोध प्रदर्शन गरेका छन् ।
आफ्ना नेता कार्यकर्तामाथि झुटा मुद्दा लगाएर पक्राउ गर्न खोजेको भन्दै धनुषाका प्रहरी प्रशासनविरुद्ध एमालेका नेता कार्यकर्ताहरूले प्रदर्शन गरेका हुन् ।
नेकपा एमालेका केन्द्रीय सदस्य एवम् पूर्वमन्त्री उमाशंकर अरगरियाको नेतृत्वमा एमालेका नेता कार्यकर्ताहरूले नाराबाजीसहित नगर परिक्रमा गर्दै जिल्ला प्रहरी कार्यालय अगाडि प्रदर्शन गरेका छन् ।
भ्रष्टाचारमा लिप्त शिक्षा विकास तथा समन्वय इकाई धनुषाका प्रमुख युक्तप्रसाद शर्माको संरक्षणमा लागेको भन्दै एमालेले धनुषाका प्रहरी उपरीक्षक विश्वराज खड्काविरुद्ध प्रदर्शन गरेको हो । एमालेका नेता कार्यकर्ताहरूले जिल्ला प्रहरी कार्यालय धनुषा घेराउ गर्दै एसपी खड्का र शिक्षा विकास तथा समन्वय इकाई धनुषाका प्रमुख शर्माविरुद्ध प्रदर्शन गरे ।
भ्रष्टाचारको आरोप लागेका इकाई प्रमुख शर्मालाई कारबाही गर्नुको साटो प्रहरी प्रशासन झन् संरक्षणमा लागेको पूर्वमन्त्री अरगरियाले आरोप लगाए । उक्त घटनामा आफ्ना नेता कार्यकर्तालाई फसाउन खोजेपछि बाध्य भएर आफूहरू सडकमा आउनुपरेको अरगरियाले बताए ।
शुक्रबार दिउँसो युवाहरूको एक समूहले शिक्षा विकास तथा समन्वय इकाई धनुषाका प्रमुख शर्मालाई कालोमोसो दलेका थिए । शिक्षक सरुवा, पदस्थापन, शिक्षक नियुक्ति लगायतको काममा शिक्षा विकास तथा समन्वय इकाई धनुषाका प्रमुख शर्माले घुस खाएको भन्दै शर्मालाई युवाहरूको समूहले कालोमोसो दलेको थियो ।
प्रदर्शनमा एमाले केन्द्रिय सदस्य संजिव झा सुरज, जिल्ला अध्यक्ष राजकिशोर यादव, विदेह नगरपालिकाका मेयर बेचन दास, औरही गाउँपलिकाका अध्यक्ष उमाशंकर साह लगायत नेता कार्यकर्ताको उपस्थिति थियो ।
This will close in 20 seconds
